Norveçin “Mölde” klubu Nəriman Axundzadə üçün “Qarabağ”a iki dəfə təklif göndərib.

Bu barədə Teleqraf-a eksklüziv açıqlamasında “Mölde”nin idman direktoru Ole Yakob Strandhagen məlumat verib.

Klub rəsmisi martın 27-də transfer pəncərəsi bağlandığı üçün məsələyə yayda aydınlıq gətirəcəklərini söyləyib.

O, 21 yaşlı hücumçunu diqqət mərkəzində saxladıqlarını vurğulayıb: “Nəriman üçün “Qarabağ”a rəsmi təklif yolladıq. Transfer pəncərəsi qısa olduğundan, növbəti transfer dönəmində danışacağıq. Müzakirələrimiz oldu, amma nəticə belədir ki, növbəti transfer dönəminə qaldı. Futbolçunu izləyirik. Böyük ehtimalla, yay transfer dönəmində məsələyə yekun vurulacaq”.

Qeyd edək ki, Nəriman Axundzadə bu mövsüm "Qarabağ"ın heyətində bütün turnirlərdə 33 oyun keçirib, 9 qol və 12 məhsuldar ötürmə ilə yadda qalıb. Onun "köhlən atlar"la müqavilə müddəti 2028-ci ilin yayına qədərdir.