Son zamanlar demək olar ki, hər həftə çox prinsipial oyunlar keçirilir. 

Bu həftəsonu da böyük bir matç var. Belə ki, İngiltərə Premyer Liqasında Mançester derbisi baş tutacaq. "Mançester Yunayted" öz evində əzəli rəqibi "Mançester Siti"ni qəbul edəcək. Səbirsizliklə gözlənilən matç 6 apreldə Bakı vaxtı ilə saat 19:30-da başlayacaq. 

Bəs bu derbisə Mançesterin hansı komandası qələbəyə daha yaxındır? 

Mövzu ilə bağlı futbol eksperti Aslan Kərimov Hit.az-a açıqlama verib. Onun proqnozuna əsasən, sözügedən derbidə "Mançester Siti" qələbəyə daha yaxın tərəfdir:

"Nəzərə almaq lazımdır ki, "Mançester Siti"də son zamanlarda geriləmə olsa da, artıq özlərinə gəlməyi bacarıblar. Düzdür, indiki halda "Arsenal" və ya "Liverpul" ilə mübarizə aparmaq onlar üçün çətin olar. Lakin "Mançester Yunayted" əzəli rəqibinə nisbətən daha zəif nəticələr göstərir. 

Düşünürəm ki, derbi "Mançester Siti"nin üstünlüyü ilə keçəcək. Üstəlik, "şəhərlilər"in zədəliləri də artıq əsas heyətə qayıtmağa başlayıb. "Mançester Yunayted"də isə hələ də oyunçu keyfiyyəti rəqibinə nisbətən daha aşağıdır. Bütün bunların fonunda "Mançester Siti"nin qələbəyə daha yaxın tərəf olacağını proqnozlaşdırıram". 

Pərviz