Türkiyənin "Fənərbağça" klubunun uğursuz çıxışı davam edir.

İstanbul təmsilçisi bu mövsümə də yaxşı başlamayıb. Klubun yeni mövsümün əvvəlindəki əsas hədəfi Çempionlar Liqasına vəsiqə qazanmaq idi. Heyətə də bu hədəfi reallaşdırmaq üçün dünya ulduzları transfer edilmişdi. 

Lakin "Fənərbağça"nın Çempionlar Liqası həsrəti bu il də davam etdi. Hərçənd ki, komanda son illərdə ilk dəfə bu qədər yaxınlaşmışdı. Demək olar ki, Avropanın 1 nömrəli klub turnirinin qapısından döndülər. 

Belə ki, "Fənərbağça" pley-off turunda qarşılaşdığı "Benfika" səddini keçə bilmədi. İstanbuldakı qolsuz bərabərliyin revanşında Portuqaliya klubu minimal hesabla qalib gəldi. 

Bəs "Fənərbağça" "Benfika"nı nə üçün məğlub edə bilmədi? 

Mövzu ilə bağlı futbol eksperti Aslan Kərimov Hit.az-a açıqlama verib. O bildirib ki, turun favoriti "Benfika" idi:

"Ümumiyyətlə, "Fənərbağça" heyət baxımından "Benfika"dan zəifdir. Yəni Portuqaliya klubu daha səviyyəli və gənc futbolçulardan ibarət komanda formalaşdırıb. 

Həmçinin, İstanbul klubu Avropa təcrübəsi baxımından da rəqibindən geri qalır. Bu isə o deməkdir ki,  "Benfika" səviyyə və təcrübə cəhətdən "Fənərbağça"dan üstün idi. Ona görə nəticə sürpriz sayılmamalıdır". 

Ekspert "Fənərbağça"nın Çempionlar Liqasına vəsiqə qazanan bilməməsinin səbəblərindən danışıb:

"Əslində, "Fənərbağça"nın heyətində hər mövqedə ayrı-ayrılıqda yaxşı futbolçular var. Ancaq bu oyunçular komanda şəklində istənilən səviyyədə çıxış etmirlər. Türkiyə Super Liqasındakı matçlarda da bunu müşahidə edirik. 

Yəni futbolçular arasında uyğunluq və anlaşma yoxdur. Üstəlik, komanda əsasən hücumameyilli futbolçulardan formalaşır. Bu isə müdafiəni zəiflətdiyi üçün "Fənərbağça" asanlıqla top buraxır. Avrokuboklarda isə belə səhvlər bağışlanmır. "Benfika" ilə matçlar da bunun real nümunəsidir". 

Pərviz