"ATV" telekanalının məşhur proqramı "Astar şou" yeni mövsümə başlayıb.

Layihənin bu dəfə iki fərqli formatla ekranda olacağı açıqlanıb. Lakin "Astar şou"nun yeni mövsümünün heyətindəki dəyişiklik də diqqətlərdən yayınmayıb. Daha doğrusu, ötən mövsüm ekran işinin aparıcı üzvlərindən olan məşhur aktrisa Gülmira Fərzəliyeva artıq layihədə yer almır. Bu isə təbii ki, izləyicilərin təəccübünə səbəb olub. Bir çox izləyici sosial şəbəkələrdə aktrisanın "Astar şou"dan nə üçün ayrıldığına dair suallar verməyə başlayıb. 

Sevilən aktrisa Gülmira Fərzəliyeva "Astar şou"dan nə üçün ayrıldığını ilk dəfə eksklüziv olaraq HİT.az-a açıqlayıb:

"Mənim "Astar şou" komandası ilə heç bir problemim yoxdur. Hər birini ayrı-ayrılıqda çox istəyirəm. Hamısı yaxşı uşaqlardır və onlara uğurlar arzulayıram. Mən o komandada işləmişəm, pul qazanmışam. Buna görə o haqda pis heç nə deyə bilmərəm. 

Sadəcə olaraq, mən başqa kanalda olan layihədə çəkildim. "Astar şou"nun rəhbərliyi isə məndən nə üçün orada çəkildiyimi soruşdu. Mən isə "Astar şou" ilə müqaviləmin olmadığı üçün heç kimin mənə qadağa qoya bilməyəcəyini dedim. Yəni belə söhbət olduğuna görə mənə söylədilər ki, gedib orada çəkildiyin üçün bir daha burada rol ala bilməzsən. Mən də uğurlar arzulayaraq layihədən ayrıldım".

Aktrisa "Astar şou"ya qayıtmağı düşünmədiyini deyib:

"Mən "Astar şou" olmayanda belə efirlərdə idim. Artıq Dilarə Əliyevanın komandasında olmaq mənim üçün kifayət qədər böyük uğurdur. Buna görə də mənim "Astar şou"da çəkilməyə ehtiyacım yoxdur. 

"Astar şou"ya qayıdacağıma isə inanmıram. Yəni o söz-söhbətdən sonra geri qayıtmaram. Amma komandanın hər bir üzvünü çox istəyirəm. Hər biri ilə münasibətimiz var, danışırıq, görüşürük. Onların da uğuruna sevinirəm, Allah yollarını açıq etsin. Bir daha deyirəm, bu, komanda ilə bağlı deyil, rəhbərliklə bağlı olan problemdir".

Pərviz Şimşək