Hazırda Azərbaycanın ən çox sevilən aktrisalarının biri də Zarina Qurbanovadır.
Gözəl aktrisa "Xəzər" telekanalında yayımlanan "Komedixana" proqramındakı çıxışı ilə diqqətləri üzərinə çəkir. Onun hər həftə canlandırdığı müxtəlif obrazlar tamaşaçıların alqışına səbəb olur. Zarina Qurbanovanın hər ləhcə ilə səlis danışması, istənilən obrazı mükəmməl ifa etməsi performansını daha da uğurlu edir.
Bəs Zarina Qurbanova kimdir?
Zarina 17 dekabr 1990-cu ildə Sumqayıt şəhərində hərbçi ailəsində dünyaya gəlib. O, öncə 190 nömrəli, ardınca isə 191 nömrəli tam orta məktəbdə təhsil alıb. 2000-2004-cü illərdə Rusiyada yaşayıb. Zarina 3 nömrəli musiqi məktəbin vokal bölməsində musiqi təhsili də alıb. Həmçinin, həmin dövrdə muğam, rəssamlıq və rəqslə də məşğul olub.
O, 2008-ci ildə Azərbaycan Dövlət Mədəniyyət və İncəsənət Universitetinin Rejissorluq fakültəsinə daxil olub. Zarina tələbəlik illərindən istedadını göstərməyə başlayıb, seçilən gənclərdən olmağı bacarıb. O, 2012-ci ildə universiteti qırmızı diplomla bitirib. Zarinanın fərqlənmə diplomu ilə universiteti bitirməsi isə nə müəllimləri, nə də tələbə yoldaşları üçün sürpriz deyildi. Əksinə, onun olduqca istedadlı olması səbəbiylə bu uğura yiyələnəcəyini gözlənilirdi.
Sənətçi karyerasının əvvəlində telekanallardakı bəzi proqramlarda aparıcılıq edib. O həm də tamaşalarda canlandırdığı obrazlarla da bacarığını nümayiş etdirib. İstedadlı aktrisa "Döngələr", "Məhkumlar", "Arzuların ardınca", "Məriz", "Sara", "Üçüncü günün adamı", "Gizlənpaç", "Tayson", "Don Marleone", "Xənnas", "Ailəcanlı", "Könül yarası", "Estakada", "Ağacdələn", "Mənim balaca Şahzadəm", "Əks təsirlər", "S.Ə.S", "Köhnə çamadanlar" kimi çox sayda film və serialda müxtəlif obrazlara həyat verib.
Zarina Qurbanova karyerasının zirvəsini isə "Komedixana"da yaşayır. Hər həftə onun çıxışını izləmək üçün tamaşalara baxmağa gedənlərin sayı durmadan artmaqdadır. Şübhəsiz ki, "Komedixana"nın bu qədər çox sevilməsinin əsas səbəblərindən biri də Zarina Qurbanova kimi istedadlı aktrisanın aparıcı rolları ifa etməsidir. Onun canlandırdığı obrazlarla səhnəciklər daha da maraqlı alınır.
Biz də gözəl aktrisaya bundan sonrakı karyerasında da daha böyük uğurlar arzulayırıq...
Pərviz Şimşək
