Sevgi münasibətlərində ən önəmli olan qayda bir-birinizə hörmət etməkdir. İstər xanımlar, istərsə də bəylər hər zaman qarşı tərəfə sayğı göstərməlidir.

Lakin hər nə qədər qadınları anlamağın çətin olduğu deyilsə də, bu söz kişilər üçün də keçərlidir. Çünki xanımlar da eynilə qarşı cinsi tanımaqda çətinlik çəkir, onların sevib-sevmədiyini, dəyər verib-vermədiklərini anlaya bilmirlər.

Əziz xanımlar, bir sevgiliniz, yaxud da xoşunuza gələn kimsə var və onun sizə hörmət etdiyini başa düşə bilmirsiz? 

Elə isə OLAY qarşı tərəfin sizə hörmət etdiyini göstərən 10 əlaməti təqdim edir:

Birincisi, bütün diqqətini sizə yönəldər.

Xanımlar tez-tez diqqətsizlikdən şikayətlənirlər. Çünki zaman-zaman qarşı tərəfin onlarla maraqlanmadığını hiss edirlər. Bir kişi sizə hörmət edirsə, mesajlarınıza gec cavab verməz, yemək yeyəndə diqqəti yalnız sizdə olar, telefona baxmaq yadına düşməz. Lakin bu hissi möhtaclıq duyğusu ilə qarışdırmayın.

Əgər birgə qurduğunuz planları tez-tez təxirə salırsa, sizin yanınızda dostları ilə mesajlaşırsa, zənglərinizi gec cavablandırırsa, özünüzü yormayın. Onun diqqətini çəkmək üçün vaxt sərf etməyin. Sizə dəyər verəcək başqa biri ilə qarşılaşa bilərsiniz... Çünki həyat layiq olmayan adamlara zaman xərcləyəcək qədər uzun deyil.

İkincisi, fikirləriniz onun üçün önəmli olar. 

Bir söhbət əsnasında sözünüzü kəsib, susdurulmaqdan pis heç nə yoxdur. Sizinlə eyni fikirdə olsun, ya da olmasın. Bu, əhəmiyyət kəsb etmir. Çünki sizi sevirsə və hörmət edirsə, fikirlərinizi sona qədər dinləyəcək. Düşüncə tərzinizin necə olduğu ilə maraqlanacaq. Davamlı olaraq nə düşündüyünüzü soruşub, fikirlərinizi ciddi qəbul edəcək. Eyni qadınlar kimi kişilər də tövsiyə ala biləcəyi, fikir mübadiləsi edəcəyi insanlarla dostluq etmək istəyir. 

Mövzulara öz baxış bucağınızdan münasibət bildirəndə sizə gülən, düşünmədən rədd edən adamla eşq yaşayırsınızsa, bilin ki, o, tək hörmətsizlik etmir. Həm də böyümək üçün vaxta ehtiyacı var. 

Üçüncüsü, sizi idarə etməyə çalışmaz.

Münasibətlərdə daim xanımları yönləndirən, kontrol edən kişilər bunu qorumaq kimi başa düşürlər. Bu, çox vaxt bir güc nümayişi kimi göstərilsə də, lap dərinlikdə güvənsizlik, qorxu və ya dəyərsizlik kimi hisslərdən qaynaqlanır. Məsələn, sizdən fikrinizi soruşmadan yemək sifariş vermək kimi davranışlar bunun göstəricisi ola bilər. 

Dördüncüsü, duyğularını açıq şəkildə ifadə edir.

Kişilərin hisslərini açıq şəkildə ifadə etməkləri daim olan problemlərdəndir. Məsələ burasındadır ki, əksər bəy bunu bacarmır. Cəmiyyətin basqıları, böyüdükləri mühit, yaxud da güvənsizliklər kişiləri duyğularını dilə gətirməkdə qadınlardan geridə qoyur. 

Ona görə də bir kişi sizə keçmişindən, qorxularından danışırsa, hörmət etdiyindən əmin ola bilərsiniz. Bunun sayğı ilə olduğu qədər güvənməklə də əlaqəsi var. Kiməsə hörmət etmədən öncə ona güvənmək olduqca çətindir. Çünki fikirləri önəm kəsb etməyən birinə duyğularınızdan danışacaq qədər güvənilir hiss etməzsiniz. Bu səbəbdən də bir kişi atasının ona necə dəyərsiz hiss etdirdiyindən danışırsa, buna önəm verin. Çünki sizə hörmət etdiyinin bariz göstəricisidir.

Beşincisi, sizi uğurlu olmağa sövq edər. 

Birinə hörmət etmək onun uğurlu olmağı üçün hər cür dəstəyi göstərəcəyinizi hiss etdirir. Yəni onu fərqləndirən xüsusiyyətlərini sevirsiz, onunla qürur duymağı sevirsiz və daha çox uğurlu olmağı üçün can atırsız. Lakin qarşı tərəf tez-tez həvəsinizə soyuq su tökürsə, hədəflərinizlə maraqlanmırsa, yaxud da daha pisi özünüzü inkişaf etdirmək üçün cəhdlərinizi görməzdən gəlirsə, yol yaxınkən yolunuzu dəyişin. O adamla ömür keçməz, sizə hörmət etməyi öyrənməz. 

Altıncısı, gözləntiləri ilə bağlı dürüstdür.

İstər bir aydır münasibətdə olun, istərsə də bir il. Sizə hörmət edən kişi münasibətinizlə bağlı açıq müzakirə aparacaq. Bəzən hazırda ciddi münasibət istəmədiyini deyə bilər. Lakin bunu açıq şəkildə danışdığı müddətdə sənə hörmət etdiyini göstərir. Ya da həftəsonu planları, bir-birinizin valideynləri ilə görüş haqqında fikirlərini açıq bildirdiyi müddətdə bir problem yoxdur. Mübahisələrdə nə çıxırsa, çıxsın, sizə hörmət edən kişi əlindən gələn qədər dürüst olacaq və fikirlərini rahat ifadə edəcək.

Yeddincisi, bir-birinizin həyatına daxil olmağınızı istəyər.

Bir kişi ilə uzun müddətdir danışıb, görüşürsünüzsə, sonunda bir-birinizin ailəsi, dostları ilə tanış olmağınızın məntiqlidir. Sizə hörmət edirsə, həyatınızın bütün məqamlarını öyrənmək istəyəcək. Lakin qarşı tərəfin həyatı haqqında bir fikriniz yoxdursa, onun dostlarından birinin belə adını bilmirsinizsə, ehtiyatlı olun.

Səkkizinci, hər zaman sizin zövqünüzlə maraqlanar.

Bir kişi sadəcə sekslə maraqlanırsa və sizə heç bir hörmət etmirsə, çox vaxt eqoistlik edəcək. Sayğı göstərən kişi sizi birinci yerə qoyacaq. Seçdiyi restoranı bəyəndiyinizdən əmin olacaq, hava soyuyanda sizə gödəkcəsini verəcək, sizi güldürməyə çalışacaq və duyğularınıza sayğı göstərəcəkdir.

Doqquzuncusu, qısqanmaz.

Qısqanclıq bir az fikirləri qarışdırır. Çünki hər zaman harada olduğunuzu bilmək istəyən, telefonunuza baxan, onsuz hər dəfə tək bir yerə gedəndə problem yaradamla sizi qısqanmayan kişi arasında böyük fərq var. Bu tipli davranışlar sizə güvənmədiyini, yaxud da şəxsi həyatınıza dəyər vermədiyini göstərir.

Onuncu, sizin bir nömrəli pərəstişkarınızdır. 

Həyatınızda həqiqətən hörmət etdiyiniz birini fikirləşin. Bəlkə ananız, müəlliminiz, ya da ən yaxın dostunuz. Birinə hörmət edəndə, həqiqətən də bir nömrəli heyranı olursunuz və həyatta xoşbəxt, sağlam, özündən əmin görmək istəyirsiniz. Sizə hörmət edən kişi də eyni şəkildə bir nömrəli pərəstişkarınız kimi yanınızda olacaq.