Uorvik Universitetinin alimləri müəyyən ediblər ki, yuxu keyfiyyətinin subyektiv hissi sağlamlıq üçün yuxudakı saatların sayından və ya onu izləmək üçün cihazlardan alınan məlumatlardan daha vacibdir. Hit.az xəbər verir ki, tədqiqat "Emotion" jurnalında dərc olunub.

Tədqiqatda 18-22 yaş arası 100-dən çox insan iştirak edib. Onlar yuxu izləmə cihazları taxıb və gündəlik yuxunun keyfiyyəti, yuxuya getmə vaxtı və yuxu saatlarının sayı barədə gündəlik qeyd aparıblar. Onlar həmçinin gün ərzində beş dəfə müsbət və mənfi emosiyalarını və ümumi həyatdan məmnunluqlarını qiymətləndiriblər.

Tədqiqatçılar daha sonra yuxu monitorinqi cihazlarından alınan məlumatları iştirakçıların qavrayışları və hissləri ilə müqayisə ediblər. Cihazlar yuxu keyfiyyətinin pis olduğunu bildirsə belə, yaxşı yatdıqlarını hiss edən insanlar ertəsi gün daha yaxşı əhval-ruhiyyədə olublar.

“Yuxu izləyicisi dünən gecə yaxşı yatmadığınızı deyə bilsə belə, yuxunuzun keyfiyyəti ilə bağlı öz qavrayışınız olduqca müsbət ola bilər. Əgər yaxşı yatdığınızı düşünürsünüzsə, bu, ertəsi gün əhvalınızı yaxşılaşdıra bilər”, deyə alimlər izah ediblər.

Müəlliflər qeyd ediblər ki, onların nəticələri əvvəlki tədqiqatlara uyğundur və bu, özlərinin bildirdiyi sağlamlıq vəziyyətinin onların həyat məmnunluğuna və rifahına həqiqi sağlamlıq vəziyyətindən daha güclü təsir göstərdiyini sübut edib.

Samir