London İqtisadiyyat Məktəbinin alimləri Britaniyanın “Vitality” sığorta şirkətinin mütəxəssisləri ilə birlikdə müəyyən ediblər ki, həftədə üç dəfə ən azı beş min addım atmaq kişilərin ömrünü 2,5 il, qadınlarda isə 3 il artıra bilər. 

HİT.az xəbər verir ki, araşdırmanın nəticələri "The Lancet"də dərc olunub.

Tədqiqatda elm adamları son 10 ildə bir milyondan çox insanın fiziki aktivlik səviyyələrinə baxıb və Böyük Britaniya və Cənubi Afrikadakı insanların hərəkət vərdişlərinin xəritəsini hazırlayıblar. Xəritədə göstərilən məlumatlara görə, britaniyalıların 35%-i qeyri-aktiv insanlar kimi təsnif edilir. Alimlər qeyd ediblər ki, passiv həyat tərzi ürək-damar xəstəlikləri, piylənmə, şəkərli diabet və xərçəngə səbəb ola bilər.

Tədqiqatçılar hesablayıblar ki, fiziki cəhətdən aktiv olmayan vətəndaşların hərəkətliliyinin həftədə beş min addıma qədər artırılması, xəstəxanaya yerləşdirilmələrin sayının azalması səbəbindən Böyük Britaniya Milli Səhiyyə Xidmətinə hər il 4 milyard funt-sterlinqə qənaət edə bilər.

Oturaq insanlar həftədə 3 dəfə 5 min addım atmağa başlasalar, təxmini qənaət 15 milyard funt-sterlinqə yüksələ bilər.

Tədqiqatçılar həmçinin belə nəticəyə gəliblər ki, həftədə 15 000 addım atmaq kişilərdə ömür müddətini 2,5 il, qadınlarda isə 3 il artıra bilər. Bu müsbət təsir fiziki hazırlığın yaxşılaşması səbəbindən şəkərli diabet, piylənmə, həmçinin ürək, damar və psixi xəstəliklərin inkişaf sürətinin azalması ilə bağlıdır.

Samir