Britaniyanın Bristol Universitetinin alimləri məməlilərin təkamülü haqqında mövcud nəzəriyyələri sarsıdan mühüm bir kəşfə imza atıblar. Yeni araşdırmaya görə, müasir heyvanların və insanların uzaq əcdadları yerüstü həyata dinozavrların məhvinə səbəb olan asteroid düşməsindən milyonlarla il əvvəl keçməyə başlayıblar. 

HİT.az xəbər verir ki, tədqiqat "Paleontology" elmi jurnalında dərc olunub.

Uzun illər paleontoloqlar hesab edirdilər ki, dinozavrlar Yer kürəsinin bütün ekoloji nişlərini ələ keçirərək məməlilərin inkişafına mane olub. Buna görə də, məməlilərin həqiqi yüksəlişi yalnız 66 milyon il əvvəl baş verən asteroid zərbəsi nəticəsində dinozavrların kütləvi məhvindən sonra başlamışdı.

Lakin Bristol Universitetinin alimləri Şimali Amerikada tapılan 300-dən çox fosil nümunəsini təhlil edərək müəyyən ediblər ki, artıq 72 milyon il əvvəl bəzi məməlilər – xüsusilə kisəlilər və ciftlilər – ağac həyat tərzindən imtina edərək yerüstü mühitə uyğunlaşmağa başlayıblar.

Bu təkamül dəyişikliyi güllü bitkilərin (örtüktoxumlu bitkilərin) inkişafı ilə əlaqələndirilir. Yeni bitki örtüyü daha stabil və əlverişli qida mənbələri yaradaraq məməlilərə dinozavrlarla yanaşı təkamüllərini davam etdirmək imkanı verib.

Mütəxəssislər hesab edirlər ki, asteroidin Yerə düşməsi və dinozavrların yox olması məməlilərin inkişafını sürətləndirib, lakin onların yüksəlişi daha erkən başlamışdı. Beləliklə, məməlilər dinozavrlar hələ planetə hökm edərkən də yeni ekoloji nişlərə uyğunlaşmağa başlamışdılar.

Bu kəşf, məməlilərin təkamül tarixini yenidən nəzərdən keçirməyə və onların dinozavrlarla yanaşı necə inkişaf etdiklərini daha dərindən araşdırmağa imkan yaradır.

Samir