Evin təmizliyi zamanı bir çox insanın unudaraq keçdiyi sahələrdən biri də jalüzilərdir. Halbuki, mütəxəssislərin fikrincə, jalüzilərin mütəmadi təmizlənməsi təkcə mənzilin vizual görünüşünü və havasını yaxşılaşdırmır, həm də onların uzunömürlü olmasını təmin edir. 

HİT.az xəbər verir ki, "Martha Stewart" nəşrinə danışan ekspertlər vinil, taxta və parça jalüzilərin təmizliyi ilə bağlı konkret məsləhətlər təqdim ediblər.

Vinil və taxta jalüzilər necə təmizlənməlidir?

Təmizliyə başlamazdan əvvəl jalüzilərin tozunu mikrofiber parça, təmiz corab və ya tük fırçası ilə yuxarıdan aşağıya doğru silin.

Sonra bərabər miqdarda sirkə və suyu qarışdırıb bir spreylə təmiz bir parçanın üzərinə sıxın və hər bir lamel (zolaq) ayrı-ayrılıqda silin.

Bundan sonra, jalüziləri dərhal quru bir mikrofiber parça və ya corabla silin ki, su ləkələri yaranmasın.

Taxta jalüzilər üçün əlavə məsləhət: Mütəxəssislər mebel üçün nəzərdə tutulmuş parıltıverici vasitələrdən istifadə etməyi tövsiyə edirlər. Az miqdarda məhsulu mikrofiber parçaya çəkərək hər bir taxta zolağı silin. Bu, ağacı qoruyur və daha parlaq görünməsinə kömək edir.

Parça jalüzilər necə təmizlənməlidir?

Bu növ jalüziləri yaxşı təmizləmək üçün əvvəlcə pəncərədən çıxarmaq lazımdır.

1. Vannanı ilıq su ilə doldurun, bir neçə damcı yumşaq məişət sabunu əlavə edin.
2. Jalüziləri bu suya salaraq təxminən 1 saat saxlayın.
3. Daha sonra qalan ləkələri mikrofiber parça və ya süngərlə yumşaq şəkildə silin.
4. Suyu boşaldaraq jalüziləri yaxşıca yuyun.
5. Qurutmaq üçün ya asın, ya da dəsmalın üzərinə sərib qurudun.
6. Tam quruduqdan sonra yenidən pəncərəyə quraşdırın.

Ləkələr üçün xüsusi üsul

Çətin ləkələr üçün yemək sodası və köhnə diş fırçası kömək edə bilər. Bir neçə xörək qaşığı sodanı az miqdarda su ilə qarışdırın və diş fırçası ilə ləkənin üzərinə yüngülcə sürtün.

Sonra mikrofiber parça ilə silərək qarışığı təmizləyin və dərhal quru parça ilə qurulayın ki, su ləkələri qalmasın.

Jalüzilər nə qədər tez-tez təmizlənməlidir?

Ekspertlər jalüziləri həftədə bir dəfə yüngülcə, ayda bir dəfə isə dərin təmizləmə ilə təmizləməyi tövsiyə edirlər. Əgər bu mümkün deyilsə, heç olmasa ildə dörd dəfə – mövsüm dəyişikliklərində ümumi təmizlik zamanı bu prosesə xüsusi diqqət yetirilməlidir.

"FreshSpace Cleaning" şirkətinin baş təmizlik eksperti Ronda Uilson qeyd edir ki, jalüzilərin baxımsız qalması həm görünüşü, həm də havanı mənfi təsirləyə bilər.

Samir