Yeni astronomik araşdırma göstərir ki, Yer planeti Günəşin ömrünün sona çatmasından əvvəl belə, Günəş sistemindən "çıxarıla" bilər - səbəb isə "uçub gələn" ulduzun gözlənilməz hərəkət trayektoriyası ola bilər

HİT.az xəbər verir ki, bu barədə "Daily Galaxy" yazır.

Baxmayaraq ki, bu ssenari milyardlarla il ərzində inkişaf edə bilər, alimlər indidən bu cür kosmik "qonaqların" planetlərin orbitlərinə nə qədər təsir edə biləcəyini modelləşdirirlər. Hesablamaların nəticələri isə narahatlıq doğurur.

Ənənəvi Günəş sistemi modellərində bu sistem adətən təcrid olunmuş şəkildə nəzərdən keçirilir. Lakin Süd Yolu qalaktikası ulduzlarla doludur və onların bəziləri Günəş sisteminin yaxınlığından təhlükəli dərəcədə keçə bilir.

Əksər hallarda bu cür ulduz keçidləri əhəmiyyətli dəyişiklik yaratmır. Lakin bəzi hallarda, planetlərin orbitlərini sabit saxlayan cazibə balansını pozaraq, sistemin uzunmüddətli sabitliyini təhlükə altına ala bilər.

"Icarus" elmi jurnalında dərc olunan yeni tədqiqatda NASA-nın "Horizons" sistemi üzərindən 2000 simulyasiya aparılıb. Alimlər Günəş sisteminin yaxınlığından keçən ulduzları modellərə daxil edərək, bu keçidlərin sistemin sabitliyini təxminən 50% azalda biləcəyini müəyyən ediblər. Qeyd olunur ki, bu qeyri-sabitlik planetlər arasında bərabər paylanmır – bəziləri daha həssasdır.

Ən yüksək riskə malik planet kimi Merkuri önə çıxır. Onun orbitində zamanla artan eksantriklik (dartılmışlıq) təbii olaraq qeyri-sabitlik yaradır. Bu, Merkuri ilə Venera arasında toqquşma və ya planetin Günəşə düşməsi ehtimalını artırır. Keçici bir ulduzun təsiri isə bu riski daha da gücləndirə bilər.

Simulyasiyalar göstərir ki, belə ssenarilərdə Merkuri tez-tez orbitdən çıxır, bəzi hallarda isə Mars da bu aqibətlə üzləşir.

Yer planeti bu modellərdə nisbətən sabit qalsa da, digər planetlərin (xüsusilə də böyük kütləyə malik olanların) orbitləri pozularsa və Yerin trayektoriyasına təsir edərsə, onun da Günəş sistemindən atılması ehtimalı yaranır.

Bu cür hadisələr yalnız beş milyard il sonra baş verə bilər. Lakin bu tədqiqat bizim kosmosdakı varlığımızın nə qədər həssas olduğunu bir daha xatırladır.

Yer, bəlkə də, Günəşin qırmızı nəhəngə çevrilməsini gözləmədən məhv ola bilər – yaxınlıqdan keçən təsadüfi bir ulduz, planetimizi soyuq və qaranlıq ulduzlararası boşluğa atmaq üçün yetərli ola bilər.

Samir