Musanın Qırmızı dənizi iki yerə ayıraraq israilliləri Misirdən çıxardığı hadisə Tövratın ən məşhur əfsanələrindən biridir. Müqəddəs kitabda Allahın rəhbərliyi ilə Musa əsanı suya uzadaraq dənizi iki yerə ayırır və xalqına suyun içindən quru yolla keçmək imkanı verir. Onların arxasınca gələn firon ordusu isə suyun qapanması nəticəsində boğulur.

HİT.az xəbər verir ki, indi isə "Mirror" nəşrinin yazdığına görə, alimlər bu hadisənin təbii elmi izahını təqdim ediblər. Onlar bildirirlər ki, bu hadisə güclü külək və relyefin uyğunluğu nəticəsində baş verə bilən təbii bir hadisə ola bilər.

Kompüter modellərinə əsaslanan tədqiqatlar göstərir ki, əgər külək saatda 100 km sürətlə doğru istiqamətdə əsərsə, dənizdə 5 kilometrlik bir keçid açmaq mümkündür. Külək dayandıqdan sonra isə su sürətlə geri qayıdaraq, sunami effektilə hər şeyi yuyub apara bilərdi. Bu, fironun ordusunun boğulmasını izah edə bilər.

Milli Okean və Atmosfer Tədqiqatları İdarəsinin keçmiş elmi əməkdaşı doktor Bryus Parkerin fikrincə, Musa bu keçid zamanı dənizdəki qabarma-çəkilmə dövrlərindən istifadə edib.

"Musa gənc yaşlarında səhrada yaşayırdı və karvanların çəkilmə zamanı Qırmızı dənizi haradan keçdiyini bilirdi. O, gecə səmasını tanıyırdı və Ayın vəziyyətinə görə qədim çəkilmə proqnozlaşdırma üsullarına bələd idi", deyə Parker bildirib.

İsrailin Qüds şəhərində yerləşən İvrit Universitetinin okeanoloqu professor Natan Paldor qeyd edir ki, əgər külək bir gün ərzində körfəz boyu cənub istiqamətində davamlı əsərsə, bu zaman su sahildən uzaqlaşar və əvvəllər suyun altında olan dəniz dibi açılar.

Professorun hesablamalarına əsasən, əgər külək bütün gecə ərzində şimal-qərbdən saatda 65–70 km sürətlə əsərsə, dənizin suları təxminən 1 mil geriyə çəkilərdi. Bu, su səviyyəsini təxminən 3 metr endirər və israillilərə dəniz dibindəki təbii sualtı keçid üzərindən hərəkət etməyə imkan verərdi.

Samir