Günəş sisteminin uzaq guşələrində, hələ müşahidə edilməmiş sirli bir planetin mövcudluğu uzun müddətdir müzakirə olunur. "Doqquzuncu Planet" və ya "Planet X" adlandırılan bu hipotetik planetin həqiqətən mövcud olub-olmaması hələ də dəqiqləşməyib.

HİT.az xəbər verir ki, lakin "Nature Astronomy" jurnalında dərc olunan yeni bir araşdırma, bu planetin olma ehtimalının ən azı 40% olduğunu irəli sürür. Bu faiz birbaşa sübut təqdim etməsə də, alimlərin mövzuya olan marağını və ümidlərini canlı saxlamaq üçün kifayətdir. Araşdırma, planetlərin necə formalaşdığı barədə hazırlanmış modellərə əsaslanaraq, Günəş Sisteminin məlum sərhədlərindən kənarda bir planetin yarana biləcəyini və zamanla uzaq bölgələrə itələnə biləcəyini göstərir.

2006-cı ildə Plutonun planet statusunu itirməsindən bəri, Günəş sistemində doqquzuncu planet ideyası həm elm dünyasında, həm də ictimaiyyətdə tez-tez müzakirə olunur. O vaxtdan bəri bir çox tədqiqatçı, söhbəti gedən planetin mövcudluğunu dəstəkləyən və ya təkzib edən işlər təqdim etdi. Lakin bu günə qədər bu planetin mövcudluğuna dair birbaşa müşahidə edilə bilməyib.

Buna baxmayaraq, bəzi işarələr alimləri şübhələndirməyə sövq edir. Xüsusilə Neptunun kənarında, qeyri-adi dərəcədə uzun və elliptik orbitlərə malik cisimlərin mövcudluğu, Günəş sisteminin xarici hissəsində gizli bir kütlənin təsir göstərə biləcəyi ehtimalını aktual saxlayır.

Yeni dərc olunan iş, planet formalaşması modellərindən istifadə edərək "Doqquzuncu Planet"in mövcud olma ehtimalını riyazi olaraq qiymətləndirməyə çalışır. Əldə olunan nəticə göstərir ki, belə bir planetin Günəş sisteminin uzaq bölgələrində tapılma ehtimalı təxminən 40%-dir.

Əlbəttə, bu faiz planetin həqiqətən mövcud olduğu demək deyil. Lakin astronomların illərdir apardığı tədqiqatlara daha sistematik əsas verməsi baxımından əhəmiyyətli bir inkişaf hesab olunur.

Alimlər bu ehtimalı aydınlaşdırmaq üçün daha təkmil müşahidə vasitələrinə ehtiyac olduğunu başa düşürlər. Qarşıda duran illərdə fəaliyyətə başlayacaq yeni nəsil kosmik teleskopların Günəş sisteminin uzaq bölgələrini daha ətraflı tərəmləyərək bu cür göy cisimlərini birbaşa aşkar edə biləcəyi ümid edilir.

Bəlkə də bu teleskoplardan biri, indiyədək yalnız hesablamalarda və fərziyyələrdə yer alan "Doqquzuncu Planet"i ilk dəfə olaraq görünən edəcək.

Samir