Rəqəmsal kommunikasiya üzrə mütəxəssislər müəyyən ediblər ki, müasir yeniyetmələrin səsli zənglərə cavab verməməsi sadəcə bir yaş dövrü kaprizi deyil, yeni sosial davranış modelidir. Bu, dəyişən sosial vərdişlər və emosional strategiyaları əks etdirən yeni ünsiyyət normasıdır.

HİT.az xəbər verir ki, bu barədə "The Conversation" portalı məlumat yayıb.

Smartfonların daim yeniyetmələrin əlində olmasına baxmayaraq, səsli zənglər artıq onların əsas ünsiyyət vasitəsi deyil. Canlı söhbət ani cavab tələb etdiyi üçün narahatedici və məcburi qəbul edilir. Mesajlaşma isə cavabın vaxtını, məzmununu və iştirak dərəcəsini idarə etməyə imkan verir.

Tədqiqat müəllifləri bildirirlər ki, yeniyetmələr zamanlarını, emosiyalarını və nə qədər “əlçatan” olduqlarını nəzarətdə saxlamağa çalışırlar. Zəngə cavab verməkdən imtina getdikcə şəxsi sərhədləri qorumaq və daimi rəqəmsal mövcudluq şəraitində stres səviyyəsini azaltma üsulu kimi qəbul edilir.

Ekspertlər vurğulayırlar ki, sükut və ya gecikmiş cavab artıq kobudluq əlaməti sayılmır. Əksinə, bu, “rəqəmsal nəzakətin” bir hissəsinə çevrilir – burada razılıq, gözləmə və qarşı tərəfin şəxsi məkanına hörmət ön plana çıxır.

Onların fikrincə, yeniyetmələrin zənglərə cavab verməkdən çəkinməsi sosial bacarıqların itirilməsi deyil, emosional rahatlığı əsas götürən, daha düşünülmüş və fərqli bir ünsiyyət mədəniyyətinin formalaşmasıdır.

Samir