Alimlər Avstraliya sahillərində təxminən 26 milyon il əvvəl okeanlarda ovlayan, iti dişli bir balina növü aşkar edib. Budur detallar...

HİT.az xəbər verir ki, balina fosili ilk dəfə 2019-cu ildə Avstraliya sahilində gəzinti edən şəxs tərəfindən tapılıb. Fosilin elmi əhəmiyyətini başa düşən şəxs onun hissələrini Viktoriya Muzeyinə hədiyyə edib.

Araşdırmalar nəticəsində "Janjucetus dullardi" adlandırılan bu növün müasir dişsiz balinalardan fərqli olaraq iti dişlərə malik, yırtıcı bir dəniz məməlisi olduğu müəyyən edilib.

Təxminən 2 metr uzunluğunda olduğu üçün cavan fərd hesab edilən balina fosili, kəllə sümüklərinin bəzi hissələri, qulaq sümükləri və dişləri ilə indiyə qədər tapılmış ən yaxşı qorunmuş nəsli kəsilmiş balina fəsiləsinə aid nümunələrdən biri kimi təsdiqlənib.

Araşdırmada bu balina növünün təxminən 26 milyon il əvvəl mövcud olduğu məlumatı paylaşılıb. Viktoriya Muzeyi Araşdırma İnstitutu və Monaş Universitetindən Ruerid Dunkan bildirib:

"Bu kiçik balinanın iri gözləri və iti dişlərlə dolu ağzı var idi. Onu bir növ köpək balığı kimi təsəvvür edə bilərsiniz. Kiçik və sevimli görünsə də, tamamilə zərərsiz deyildi".

Araşdırmanın nəticələri "Zoological Journal of the Linnean Society" jurnalında dərc edilib.

Samir