Amerikalı psixoloq Mars Trevers uzaq məsafəli münasibətlərdə ən çox rast gəlinən üç narahatedici siqnalı açıqlayıb.

Hit.az-ın məlumatına görə, onun "Forbes" üçün yazdığı məqalədə qeyd olunur ki, belə münasibətlər ən yaxşı halda emosional sərhədləri genişləndirir, tərəfləri daha şüurlu ünsiyyətə öyrədir və yalnız fiziki yaxınlıqdan ibarət olmayan bir bağ yaradır. Lakin ən pis halda isə bu münasibətlər güvənsizliyi artırır, qarşılıqlı qaçınmaya yol açır və inamı sarsıdır.

Trevers bildirib: "Cütlüklər tez-tez uzaq məsafəli münasibətlərin mürəkkəb emosional dinamikası ilə üzləşirlər. Hər münasibətdə çətinliklər mövcuddur, lakin bəzi təkrarlanan davranış modelləri daha ciddi problemlərin xəbərçisinə çevrilir. Bu 'qırmızı siqnallar' vaxtında nəzərə alınmasa, soyuqluq və hətta inciklik yarada bilər".

Psixoloqun qeyd etdiyi əsas siqnallar bunlardır:

Xroniki ünsiyyətdən qaçınma. Ünsiyyət hər bir münasibətin "xilas dairəsi" hesab olunur, uzaq məsafəli münasibətlərdə isə xüsusilə vacibdir. Əgər tərəfdaş söhbətlərdən yayınırsa, bu, inamı zəiflədir və emosional məsafə yaradır. Tədqiqatlar göstərir ki, tərəfdaşın diqqətli və anlayışlı reaksiyası münasibətlərin keyfiyyətinə birbaşa təsir edir. Fiziki varlıq vacib deyil, əsas odur ki, emosional əlçatanlıq qorunsun.

Gizlilik və şəffaflığın olmaması. Uzaq məsafəli münasibətlərdə inam əsasən həyatdakı hadisələrin, hisslərin və ətrafdakı insanların paylaşılması ilə formalaşır. Əgər tərəfdaş daim detalları gizlədir, söhbətləri yayındırır və ya qeyri-müəyyən izahlar verir, bu, şübhə və narahatlıq yaradır. Araşdırmalar göstərir ki, məlumatı gizlətmək çox vaxt şüursuz baş verir, lakin səbəbi nə olursa-olsun, bu, yaxınlıqdan narahatlıq siqnalı sayılır.

Nəzarətçi davranış və həddindən artıq qısqanclıq. Məsafə güvənsizliyi gücləndirdiyi üçün tərəfdaşlardan biri digərini tez-tez yoxlamağa, hesabat tələb etməyə və daim şübhələnməyə başlayır. Normal hallarda qısqanclıq müəyyən qədər təbiidir, lakin davamlı nəzarət və etimadsızlıq daha dərin problemlərə işarədir. 2017-ci ildə aparılan bir araşdırmaya görə, narahat tipli bağlanma üslubuna malik insanlar qısqanclığa daha çox meyllidirlər. Onların vəziyyəti fiziki yaxınlıqla yüngülləşsə də, uzaq münasibətlərdə bu imkan olmadığı üçün belə tərəfdaşlar həddən artıq nəzarətlə bu boşluğu doldurmağa çalışırlar.

Samir