90-cı illərin əfsanəyə çevrilmiş dodaq konturu yenidən populyarlığın zirvəsinə qayıdıb. Lakin mütəxəssislər xəbərdarlıq edirlər: bu tərzi təkrarlamazdan əvvəl düzgün texnikanı bilmək vacibdir.

Hit.az xəbər verir ki, "Glamour" nəşrinin yazdığına görə, düzgün hazırlıq və tətbiq üsulu ideal və davamlı kontur yaratmağa kömək edir.

Vizajist Sara Kul qeyd edib ki, uğurlu kontur dodaqlara dəqiqlik verir, pomadanın yayılmasının qarşısını alır və makiyajı tamamlayır.

"Dolce & Gabbana Beauty" brendinin baş vizajisti Ceyk Vorden bildirir ki, konturun köməyi ilə dodaqların formasını dəyişmək, onları simmetrik və ya vizual olaraq dolğun göstərmək mümkündür. O, başlanğıc üçün dodaqların təbii rənginə mümkün qədər yaxın və ya ondan bir-iki ton tünd çaları seçməyi tövsiyə edir.

Vordenin məsləhətlərinə əsasən, dərinin tonuna görə seçim belə ola bilər:

*açıq tonlu dəri üçün: çəhrayı, şaftalı və bej rənglər;

*orta və ya zeytun tonlu dəri üçün: çəhrayı-qəhvəyi, karamel və gavalı tonlar;

*tünd dəri üçün: tünd qəhvəyi, bordo və dərin çəhrayı çalarlar.

Başqa bir üsul isə konturu pomadanın rəngi ilə tam uyğunlaşdırmaqdır – bu, təmiz və harmonik görünüş üçün risksiz seçim sayılır.

Addım-addım təlimat:

1.Hazırlıq. Dodaqların hamar və nəmlənmiş olması vacibdir. Yüngül skrab və ya cilalayıcı balzamdan istifadə edin, sonra tərkibində antioksidant və ya şi yağı olan qidalandırıcı maska çəkin. Makiyajdan əvvəl dodaqları salfetlə azca qurulayın.

2.Kontur. Dodaqların təbii xəttini müəyyənləşdirin və qısa, yüngül hərəkətlərlə çəkərək kontur yaradın. Daha təbii görünməsi üçün xətti barmaq və ya fırça ilə bir qədər yayındırın.

3.Formanın vurğulanması. Daha aydın nəticə istəsəniz, konturu üst dodağın qövsü və ya alt dodağın ortasında bir daha təkrarlayın.

4.Yüngül korreksiya. Formanı bir qədər dəyişmək üçün tədricən eksperiment aparın – məsələn, alt dodağı azca yumrulamaq və ya "Kupidon qəlbi" hissəsini vurğulamaq olar. Əsas məsələ ölçünü saxlamaqdır.

Əgər dodaqları dolğun göstərmək istəyirsinizsə, filersiz də bunu etmək mümkündür – təbii rəngə yaxın tonla dodaq xəttindən bir qədər kənara çıxın. Lakin dodaq künclərindən kənara keçməyin, çünki bu, konturun saxta görünməsinə səbəb olur.

Samir