Astronomlar Süd Yoluna bənzər bir spiral qalaktika kəşf ediblər. Alaknanda qalaktikası Böyük Partlayışdan cəmi 1,5 milyard il sonra - kainatın müasir tarixinin təxminən onda bir hissəsu - əmələ gəlib və bu kəşf artıq alimləri qalaktikaların əmələ gəlməsi modellərini yenidən nəzərdən keçirməyə məcbur edir. 

Hit.az xəbər verir ki, kəşf Punedəki Tata Fundamental Tədqiqatlar İnstitutunun Milli Radio Astrofizika Mərkəzinin hind tədqiqatçıları Raşi Ceyn və Yoqeç Vadadekar tərəfindən edilib. Tədiqat "Astronomiya və Astrofizika" (A&A) jurnalında dərc edilib.

Həssas optika ilə təchiz olunmuş və kosmosun ən erkən dövrlərindən işıq qəbul edə bilən Ceyms Vebb Kosmik Teleskopu uzaq bölgələrdə yalnız gənc bir qalaktika deyil, həm də iki simmetrik qolu və aydın şəkildə qabarıqlığı olan tam hüquqlu bir spiral - Süd Yolu kimi yetkin disk sistemlərinə xas olan bir quruluş aşkar edib.

Bu, klassik astronomik mənzərə üçün sürprizdir. Belə qalaktikaların yavaş-yavaş əmələ gəldiyinə inanılırdı: diskdə qaz toplanmalı, sonra sabit sıxlıq dalğaları tədricən spiral qolları "çəkməli", sistemin özü isə nisbətən sakit qalmalı və dağıdıcı toqquşmalardan qaçınmalıdır. Bütün bunlar milyardlarla il çəkir.

Alaknanda bu anlayışdan yayınır. Qalaktikanın diametri təxminən 30.000 işıq ilidir və aktiv şəkildə yeni ulduzlar əmələ gətirir - ildə cəmi 60 günəş kütləsi, Süd Yolundan təxminən 20 dəfə daha sürətli. Təhlil göstərdi ki, bu ulduzların yarısı cəmi 200 milyon ildə - kosmik zamanda bir göz qırpımında əmələ gəlib.

Raşi Ceyn qeyd edib: "Alaknanda adətən daha köhnə sistemlərdə müşahidə etdiyimiz struktur yetkinliyini nümayiş etdirir. Görünür, spiral qalaktikaları əmələ gətirən fiziki proseslər düşündüyümüzdən daha sürətli baş verə bilər. Bu, bizi nəzəri çərçivəmizi yenidən düşünməyə məcbur edir".

Samir