Sauropod dinozavrlar parlaq rənglərə malik ola bilərdi: onların fosilləşmiş dərisində melanosomlara oxşar strukturlar tapılıb - hüceyrələrin piqment komponentləri. 

HİT.az xəbər verir ki, bu nəticəyə Bristol Universiteti tədqiqatçıları gəlib. Tədqiqatın nəticələri "Royal Society Open Science" (RSOS) jurnalında dərc olunub.

Alimlər Montana ştatında yerləşən “Mother’s Day” (Ana günü) karyerində tapılan nadir, üçölçülü qorunmuş dinozavr dərisi nümunələrini araşdırıblar. Bu qabıqcıqların yaşı təxminən 145 milyon il hesab olunur. Tədqiqatçılar düşünür ki, nümunələr Diplodocus-a – kiçik başlı, uzun boyunlu və quyruqlu sauropod dinozavrına aid olub.

Skan edən elektron mikroskop vasitəsilə alimlər hüceyrələrdə müxtəlif melanosomlar – melanin saxlayan və dərinin, tüklərin və gözlərin rəngini formalaşdıran mikrostruktur – aşkarlayıblar. Nümunələrdə həm uzunsov, həm də diskvari melanosomlar olub ki, bu da adətən fərqli çalarlara və mürəkkəb rəng naxışlarına işarə edir.

Dəri rəngini tam bərpa etmək hələ mümkün olmasa da, melanosomların müxtəlifliyi göstərir ki, sauropodlar ənənəvi təsvir edildiyi kimi boz deyil, çox rəngli ola bilərmiş. Struktur yoxlaması göstərib ki, dərilər səth təbəqəsi kimi deyil, həcmli şəkildə qorunub, bu da tapılmış elementlərin həqiqətən piqment orqaneləri olduğuna inamı artırır.

Samir