Son illərdə media getdikcə tənhalığı şüurlu bir həyat seçimi və özünüdərk forması kimi təsvir edir. Lakin, yeni, genişmiqyaslı bir araşdırma, gənc yetkinlik dövründə romantik münasibətlərdən uzun müddət uzaq qalmağın psixoloji rifah üçün mənfi nəticələrə səbəb olduğunu sübut edib.

HİT.az xəbər verir ki, tədqiqat Şəxsiyyət və Sosial Psixologiya Jurnalında (JPSP) dərc edilib.

Sürix Universitetinin tədqiqatçılarından ibarət bir qrup Almaniya və Böyük Britaniyada 17.000-dən çox gəncin məlumatlarını təhlil edib. Bütün iştirakçıların tədqiqatın əvvəlində (16 yaşında) romantik münasibətlərlə bağlı heç bir təcrübəsi yox idi və daha sonra 29 yaşına qədər hər il sorğu edilib.

Təhlil göstərdi ki, daha uzun müddətli tənhalıq dövrləri orta hesabla kişilər, daha yüksək təhsil səviyyəsinə malik insanlar və subyektiv rifah səviyyəsi aşağı olan gənclər üçün xarakterikdir.

Psixologiya şöbəsinin baş tədqiqatçısı Maykl Kramerin sözlərinə görə, nəticələr həm sosiodemoqrafik amillərin (məsələn, təhsil), həm də psixoloji xüsusiyyətlərin (rifah və həyat məmnuniyyəti) ilk münasibətə girmə ehtimalına təsir etdiyini təsdiqləyir. Əvvəlki sosioloji tədqiqatlarda olduğu kimi, təhsilə daha çox diqqət yetirmək münasibətlərin gecikməsi ilə əlaqələndirilir.

Tədqiqatçılar həmçinin uzun müddət subay olanların rifahını daha sonra münasibətə başlayanlarla müqayisə ediblər. Məlum olub ki, uzun müddətli subaylıq həyat məmnuniyyətinin azalması, tənhalığın artması və depressiv simptomların artması ilə əlaqələndirilir.

Bu tendensiyalar həm kişilər, həm də qadınlar üçün oxşardır. Yeniyetməlik dövründə qruplar arasındakı fərqlər minimal idi, lakin zamanla getdikcə daha çox nəzərə çarpırıb.

Gənclər romantik münasibətlərə girdikdə, onların rifahı əhəmiyyətli dərəcədə yaxşılaşıb: həyat məmnuniyyəti artıb, tənhalıq azalıb - həm qısa, həm də uzunmüddətli perspektivdə.

"Nəticələrimiz göstərir ki, uzunmüddətli tənhalıq rifah üçün orta risklərlə əlaqələndirilir", deyə Maykl Kramer qeyd edib.

Onun sözlərinə görə, insan nə qədər uzun müddət subay qalarsa, rifahda fərqlər bir o qədər çox olar və rifahın azalması da öz növbəsində subay qalma ehtimalını artırır. Bu, münasibətə girməyi xüsusilə çətinləşdirə bilər.

Samir