Uzun uçuşlar çoxları üçün elektron poçtu təmizləmək və ya kitab oxumaq üçün yaxşı fürsət kimi görünsə də, əksər sərnişinlər səfər zamanı tez yorulduqlarını hiss edirlər.
HİT.az-ın məlumatına görə, “The Mirror” yazır ki, mütəxəssislər uçuş zamanı ağırlıq və halsızlıq hissinin səbəblərini izah edib, bununla mübarizə yollarını açıqlayıblar.
Böyük Britaniyanın Milli Səhiyyə Xidmətinin həkimi Asima Hənif bildirib ki, uçuş zamanı gündəlik rejimin pozulması orqanizmin bioloji ritminə təsir göstərir.
“Uçuş zamanı adi rejimdən çıxmaq bədənin daxili saatını pozur. Məsələn, siz səhər tezdən yeməyə öyrəşməmisinizsə, təyyarədə təqdim olunan səhər yeməyi – məsələn, omlet – həzm sisteminə əlavə yük yarada bilər. Həm vaxtın dəyişməsi, həm də öyrəşmədiyiniz qidaların qəbulu həzm pozuntusu və halsızlıq yarada bilər”, deyə o qeyd edib.
“Haywards Heath”də yerləşən “Nuffield Health” klinikasının qastroenteroloqu Mark Ostin həmkarının fikirləri ilə razılaşıb.
“Qeyri-adi vaxtda uçuş orqanizmdə stress hormonlarının ifrazını artıra, aclıq, köp və narahatlıq hissi yarada bilər”, deyə o bildirib.
Onun sözlərinə görə, bir çox sərnişin təyyarədə normal yata bilmir və yuxusuzluq həzm sistemi ilə ümumi əhval-ruhiyyəyə ciddi təsir göstərir.
Hənif əlavə edib ki, yüksək hündürlükdə kabin təzyiqinin dəyişməsi və oksigen səviyyəsinin azalması da enerji və həzm prosesinə təsir edir. Bundan başqa, kabin havası quru olur ki, bu da susuzlaşma, dəri quruluğu və əlavə yorğunluq yaradır.
Ostin uçuş zamanı spirtli içkilərin qəbuluna da ehtiyatla yanaşmağı tövsiyə edib.
“Bəzən təyyarədə spirtli içki qəbul edən insanların nəzarətsiz və aqressiv davranış sərgilədiyini görürük. Alkoqol susuzlaşmaya, yuxu pozuntusuna və qida borusunun aşağı hissəsindəki əzələlərə təsir göstərərək reflüks riskini artıra bilər. Üstəlik, yüksək kalorili və şəkərli içkilər qanda şəkər səviyyəsində dəyişikliklərə səbəb olur”, deyə qastroenteroloq vurğulayıb.
Ostin həmçinin kofeinli içkilərin jet-lag təsirini gücləndirə biləcəyini bildirib.
Uçuş zamanı yorğunluğun qarşısını necə almaq olar?
Stimullaşdırıcılardan uzaq durun - Həkimlər uçuşdan əvvəl və uçuş zamanı alkoqol, qəhvə və digər kofeinli içkilərdən çəkinməyi tövsiyə edirlər.
Ağır yeməklərdən imtina edin - Kraxmallı və karbohidratlı ağır yeməklər əvəzinə daha yüngül və balanslı qidalar seçin. Zülal və tərəvəz tərkibli yeməklər orqanizmə daha az yük salır.
Böyük porsiyalar əvəzinə qəlyanaltı seçin - Güclü aclıq hiss etmirsinizsə, iri porsiyalar əvəzinə meyvə, qoz-fındıq və toxum kimi yüngül qəlyanaltılar qəbul edin.
Kifayət qədər su için - Mütəxəssislər hər saat bir stəkan su və ya yarım şüşə su içməyi məsləhət görürlər.
Hərəkətdə olun - Hər iki-üç saatdan bir ayağa qalxaraq salon daxilində qısa gəzinti edin. Hərəkət köpün azalmasına və həzm prosesinin yaxşılaşmasına kömək edə bilər.
Samir
