Ümumiyyətlə, pişik sahiblərinə verilən tövsiyələrdə mütəxəssislər onların insan qidası ilə qidalandırılmamasını məsləhət görür.

Hit.az xəbər verir ki, insanlar üçün nəzərdə tutulmuş bir çox məhsul ev heyvanlarına zərərli ola bilər və ya ən azından onların ehtiyacı olan qida maddələrini içermir.

Lakin bəzi sahiblər buna baxmayaraq "dördayaqlı dostlarını" yemək qalıqları ilə qidalandırmağa davam etdikləri üçün məşhur internet nəşri "Express" mütəxəssislərə istinad edərək, pişiklərin sağlamlığını düşündüyünüz halda heç vaxt verməməli olduğunuz məhsulların siyahısını hazırlayıb.

Pişiklər üçün qadağan olunan qidalar

Pişiklər balanslı pəhrizə və sağlamlığını qorumaq üçün xüsusi qida maddələrinə ehtiyac duyurlar – bunların hamısı xüsusi pişik qidasında mövcuddur.

Vaxtaşırı heyvanları "stol"dan bir şeylə mükafatlandırmaq istəyi yarana bilər, amma bəzi məhsullar onların sağlamlığı üçün ciddi təhlükə yaradır.

Pişiklərin əsl yırtıcı olduğunu, yəni ət ilə qidalandığını və süd məhsulları və tərəvəz kimi ləzzətləri ehtiyac duymadığını unutmayın.

Əvvəlcə pişiklərdə qida pozğunluğuna səbəb ola biləcək və ya bədəninə parazit daşıya biləcək, lakin çox güman ki, ölümcül olmayan qidaları nəzərdən keçirək. Sonra isə az miqdarda belə ciddi nəticələrə səbəb ola biləcək məhsulları sadalayacağıq.

Süd məhsulları

Çoxlu sahiblər hesab edirlər ki, bir parça pendir və ya bir az süd onların tüklü ev heyvanları üçün yaxşı bir hədiyyədir, lakin mütəxəssislərin fikri aydındır:

"Cat Protection" (Böyük Britaniyada evsiz heyvanların xilas və yerləşdirilməsi ilə məşğul olan xeyriyyə təşkilatı) məlumat verir ki, əksər pişiklər laktoza dözümsüzdür və pendir kimi süd məhsullarının qəbulu onların mədəsində pozğunluğa səbəb ola bilər.

Təşkilat bildirir: "Laktozsuz və ya bitki mənşəli pendir vermək də tövsiyə edilmir, çünki çoxu heyvan üçün potensial toksik maddələr ehtiva edə bilər".

Xam ət, balıq və yumurta

Xam ət və balıq, həmçinin xam yumurtalar zərərli bakteriya və parazitlər daşıya bilər ki, bu da pişikdə xəstəlik yarada bilər.

Həmçinin, xam sümük qidalandırmaqdan çəkinmək lazımdır, çünki boğulma və ya həzm sistemində tıxanma riski artır.

Pişiklər üçün qəti qadağan olunmuş məhsullar

Bir məsələ pişiklərə süd verməkdir; əslində çox güman ki, içməyəcəklər və mədələrinə düşsə belə maksimum olaraq qida pozğunluğu və ishal yaradar. Digər məsələ isə pişiklərin həzm sistemi üçün ciddi toksinlərdir.

Üzüm, kişmiş və qarağat

Üzüm, kişmiş və qarağat pişiklərdə böyrək çatışmazlığına səbəb ola bilər. Xroniki böyrək xəstəliyi olan heyvanlar isə daha yüksək risk altındadır.

Bu məhsullar heç vaxt pişiklərin pəhrizinə daxil edilməməlidir və əlçatmaz yerdə saxlanmalıdır.

Avokado

"Avokado yüksək yağ tərkibinə malikdir və persin adlı toksin ehtiva edir. Böyük miqdarda qəbul edildikdə pişiklərdə sağlamlıq problemlərinə səbəb ola bilər", deyə mütəxəssislər bildirir.

Şokolad və kofe

Şokolad, kofe və kofein ehtiva edən digər məhsullar metilksantin adlı maddələrin yüksək konsentrasiyasına malikdir. Mütəxəssislərin sözlərinə görə, pişiklər tərəfindən qəbul edilərsə, bu maddələr son dərəcə toksik ola bilər.

Mütəxəssislər əlavə edir: "Bəzi heyvanlar insan qidasının qoxusuna və ya dadına cəlb oluna bilər; riskləri bilmədən cəhd edə bilərlər".

Ən yaxşı tədbir – potensial təhlükəli məhsulları heyvanların əl çatmayan yerində saxlamaq və qida qalıqlarını örtmək və ya götürməkdir.

Samir