Təmizlik vaxtı bəzən prosesi asanlaşdıran vasitə mətbəx şkafında tapıla bilər. Adətən təmizlikdə ağ sirkə istifadə olunsa da, alma sirkəsi də bəzi hallarda faydalı ola bilər.

HİT.az xəbər verir ki, bu barədə "Southern Living" yazıb.

“Alma sirkəsi təmizlik üçün istifadə oluna bilər, amma çox ehtiyatla. O, qoxunun azaldılması, çirkin təmizlənməsi və bəzi səthi bakteriyaların məhv edilməsində effektivdir, lakin dezinfeksiyaedici vasitə deyil", deyə Home Reimagined təmizlik mütəxəssisi Jaklin Ştayn bildirib.

Mütəxəssis qeyd edir ki, alma sirkəsi daha çox yüngül təmizlik işləri üçün uyğundur, lakin bəzi səthlərdə istifadə edilməməlidir. İstifadədən əvvəl həmişə kiçik bir sahədə yoxlama aparmaq, həmçinin sirkəni heç vaxt xlor əsaslı vasitələrlə qarışdırmamaq tövsiyə olunur. Təmizlik üçün alma sirkəsi mütləq su ilə durulaşdırılmalıdır.

“Saf alma sirkəsi bəzi səthlər üçün çox aqressiv ola bilər və açığı, ağ sirkədən daha güclü qoxuya malikdir. Mən bir hissə alma sirkəsini bir hissə su ilə sprey qabında qarışdırmağı tövsiyə edirəm", deyə Ştayn bildirib.

O əlavə edib ki, sirkə parça və ya süngərə az miqdarda tökülərək də istifadə oluna bilər. Qoxunu azaltmaq üçün isə bir neçə damcı limon və ya lavanda efir yağı əlavə etmək mümkündür.

Alma sirkəsi ilə nə təmizləmək olar?

Əgər alma sirkəsini təmizlik rutininə daxil etmək istəyirsinizsə, mütəxəssis evdə istifadə üçün aşağıdakı üsulları tövsiyə edir:

* Şüşə və güzgülər: Su ilə durulaşdırılmış məhlul ləkəsiz parıltı yaradır.
* Mikrodalğalı soba: Sirkəli su ilə qabı qızdırdıqdan sonra iç səthi silmək kifayətdir.
* Drenajın təmizlənməsi: Qoxunun azalması və yağların həll olunması üçün sirkə və soda birlikdə istifadə oluna bilər.
* Paltaryuyan: Durulama mərhələsinə yarım stəkan əlavə etmək paltarları yumşaldır və qoxunu azaldır.
* Unitaz: Bir stəkan sirkəni gecə boyunca unitazda saxlayıb səhər təmizləmək olar.
* Heyvanlarla bağlı ləkələr: xalçada qoxunun neytrallaşdırılmasına kömək edir, lakin əvvəlcə kiçik sahədə yoxlanmalıdır.

Bununla belə, alma sirkəsi mikrobları tam məhv edə bilmədiyi üçün, məsələn çiy ətlə təmasdan sonra səthlərin dezinfeksiyası üçün uyğun deyil.

Alma sirkəsi ilə nəyi təmizləmək olmaz?

Bəzi səthlər var ki, hətta yumşaq hesab edilən alma sirkəsi üçün belə uyğun deyil:

* Təbii daş səthlər (qranit, mərmər, travertin): sirkə səthi tutqunlaşdırır və qoruyucu örtüyü zədələyir.
* Ağac səthlər (xüsusilə qorunmamış): qurudur, təbii yağları çıxarır və zədələyə bilər.
* Elektronika və ekranlar: turşulu tərkib çox aqressivdir və zərər verə bilər.

Mütəxəssis həmçinin istehsalçı etiketlərindəki təlimatlara əməl etməyi və turşu əsaslı təmizləyicilərin istifadəsinə dair göstərişləri yoxlamağı tövsiyə edir.

Kifə qarşı istifadə

Alma sirkəsi səthi kiflə mübarizədə müəyyən qədər təsirli ola bilər, çünki antifungal xüsusiyyətlərə malikdir. Lakin böyük miqyaslı kif problemi və ya məsaməli səthlər (məsələn, alçıpan) üçün kifayət qədər güclü deyil. Ən yaxşı nəticə pəncərəaltı kimi kiçik sahələrdə əldə olunur.

Paltaryuyan maşının təmizlənməsi

Qeyd olunur ki, adi masa sirkəsi çöküntünü həll edə, bakteriyaları və qoxunu azalda bilər. Buna görə paltaryuyanların təmizlənməsində tez-tez istifadə olunur. Lakin sirkə aqressiv olduğu üçün rezin hissələri və прокладkaları zədələyə bilər və güclü qoxu buraxa bilər.

Samir