Oksford Universiteti tərəfindən 76 ölkədə 80 min insanın iştirakı ilə həyata keçirilən genişmiqyaslı araşdırma xoşbəxtliyin sirrini ortaya çıxarıb. Yaşam məmnunluğunu zirvəyə qaldıran əsas amillərin maddi qazanc deyil, insanın xarakterində formalaşan beş əsas davranış modeli olduğu müəyyən edilib.

HİT.az xəbər verir ki, həyatın hansı dövründə insanın özünü daha çox rahat və məmnun hiss etməsi uzun illərdir müzakirə olunan mövzulardan biridir. Bir çox insan bu hissi yüksək gəlir və ya dəbdəbəli həyat şəraitində axtarsa da, elm diqqəti tamamilə insanın daxili dünyasına yönəldir.

Oksford Universitetinin apardığı geniş araşdırma xoşbəxtliyin formulunu xarici amillərdə deyil, insanın xarakterindəki beş davranış xüsusiyyətində tapıb. 76 müxtəlif ölkədən 80 min nəfərin qatıldığı tədqiqat həyat məmnunluğu ilə bağlı təsəvvürləri dəyişdirib.

Xoşbəxtliyi gətirən beş xarakter xüsusiyyəti

Daha əvvəl akademik araşdırmalar əsasən gəlir səviyyəsi və yaşayış mühiti kimi xarici faktorları araşdırırdı. Oksford mütəxəssisləri isə insanın həyata yanaşma tərzini, yəni psixoloji davranış modellərini analiz edib. Nəticələrə görə, harada yaşamasından asılı olmayaraq bu xüsusiyyətlərə sahib insanlar həyatdan daha çox zövq alır:

Səbir və risk balansı: Həyatın çətinliklərinə qarşı dözümlü olmaqla yanaşı, lazım olduqda cəsarətli qərarlar verə bilmək və riski idarə etmək.

Qarşılıqlılıq prinsipi: Ətrafda baş verənlərə biganə qalmamaq, yaxşı davranışları dəstəkləmək və ədalətsiz hallara qarşı aktiv mövqe tutmaq.

Fədakarlıq: Heç bir şəxsi maraq güdmədən, səmimi şəkildə başqalarına yardım etmək.

Etibar hissi: İnsan münasibətlərində güvənə əsaslanan möhkəm bir sosial baza formalaşdıra bilmək.

Mütəxəssislər bildirir ki, cəmiyyətlərin ümumi rifahını artırmaq istəyən hökumətlər və qurumlar bu sosial bağları gücləndirən layihələrə daha çox diqqət ayırmalıdır.

Həyat məmnunluğunun zirvə nöqtəsi: 47 yaş yetkinliyi

Qlobal təhlildən sonra Böyük Britaniyada aparılan başqa bir sahə araşdırması da diqqətçəkən nəticələr ortaya qoyub. Araşdırmaya əsasən, insanlar həm sağlamlıq, həm də xoşbəxtlik baxımından ən sabit və yetkin dövrə 47 yaşında çatırlar. Kortni Kardasian, Ceyms Korden və NASA astronavtı Kristina Koç kimi tanınmış şəxslərin bu yaş qrupunda olması da diqqət çəkən nümunələr arasında göstərilir.

Qırx yaşların sonuna doğru artan bu özünəinam və həyat enerjisi, əsasən insanın prioritetlərinin dəyişməsi ilə izah olunur. Bu dövrdə insanlar xarici görünüşdən daha çox daxili sağlamlığa, bədən funksiyalarına və ümumi rifaha fokuslanırlar. Beləliklə, Oksfordun qeyd etdiyi beş xarakter xüsusiyyətini həyat tərzinə daxil edən şəxslərdə həyat məmnunluğu daha yüksək səviyyəyə çatır.

Samir