90-cı illərdə ev interyerlərində geniş yayılmış xrom örtüklü dekor elementləri yenidən populyarlıq qazanır.
HİT.az xəbər verir ki, bu barədə "Good Housekeeping" nəşri məlumat yayıb.
Söhbət vaxtilə kranlar, qapı tutacaqları, mebellər və digər interyer detallarında geniş istifadə olunan parlaq xrom örtükdən gedir. Hazırda bu material yenidən vanna otaqlarında, qonaq otaqlarında və hətta işıqlandırma elementlərində tətbiq olunur.
San-Dieqolu dizayner Diana Luna bildirib ki, karyerasının ilk illəri məhz 1990-cı illərə təsadüf edib və o dövrdə xromun sürətlə yayıldığını yaxından müşahidə edib.
Onun sözlərinə görə, həmin dövrdə xrom örtüklü qapı tutacaqları, kranlar, şkaf dəstəkləri və santexnika avadanlıqları həm adi mənzillərdə, həm də dəbdəbəli evlərdə geniş istifadə olunurdu.
Dizayner Terri Fiori isə qeyd edib ki, xromun populyarlığı hələ 1920-ci illərdə yaranmış "Art Deco" üslubuna gedib çıxır. Həmin dövrdə bu material münasib qiymətə dəbdəbəli görünüş yaratdığı üçün "kasıbların gümüşü" adlandırılırdı.
Xromdan müasir interyerdə necə istifadə etmək olar?
Dizayner Tina Ramçandani xrom elementləri kərpic divarlarla birləşdirməyi tövsiyə edir. Onun sözlərinə görə, sənaye üslubu ilə zərif metalın kontrastı həm klassik, həm də müasir görünüş yaradır.
O, həmçinin interyerdə heykəltəraşlıq üslublu xrom döşəmə lampaları və minimalist divar lampalarından istifadə etməyi məsləhət görür. Dizayner vurğulayır ki, xrom əsas material deyil, interyerdə vurğu elementi kimi istifadə edildikdə daha uğurlu nəticə verir.
Digər dizayner Loren Smit isə xromun zeytun yaşılı, indiqo, kömür boz və badımcan rəngi kimi dərin çalarlarla birləşdirilməsini tövsiyə edir. Onun fikrincə, bu rənglər xromun parlaq səthi ilə birlikdə daha zəngin və zərif görünüş yaradır.
Mütəxəssislər hesab edirlər ki, xrom ən yaxşı şəkildə ağac, kətan parçalar, dekorativ suvaq və təbii daş kimi isti teksturalarla uyğunlaşır. Loren Smit xüsusilə xromun ot lifindən hazırlanmış divar kağızları, məxmər və moxer parçalarla, eləcə də vannalarda və bar guşələrində relyefli ağac elementləri ilə birləşdirilməsini uğurlu seçim hesab edir.
Samir
