İsti havalarda bir çox insan kondisioner işlədiyi halda belə pəncərəni açıq saxlayır. Lakin mütəxəssislər xəbərdarlıq edirlər ki, bu vərdiş otağın soyudulmasının səmərəliliyini azaldır və elektrik enerjisi sərfiyyatını artırır. 

HİT.az xəbər verir ki, bu barədə "NLC" portalı yazır.

Mütəxəssislərin sözlərinə görə, açıq pəncərədən otağa davamlı şəkildə isti hava daxil olur və divarlar, döşəmə, eləcə də mebellər qızır. Nəticədə kondisioner rahat temperaturu saxlamaq üçün daha uzun müddət və daha intensiv işləməli olur.

Mütəxəssislər "impuls havalandırması" adlanan üsuldan istifadə etməyi tövsiyə edirlər.

Bu üsul kondisioneri bir neçə dəqiqəlik söndürərək pəncərələri tam açmaqdan ibarətdir. Qısa müddətdə güclü hava axını otaqdakı havanı yeniləyir, lakin daxildəki səthlərin ciddi şəkildə isinməsinə imkan vermir.

Bundan sonra kondisioneri yenidən işə salmaq olar.

Mütəxəssislər bildirirlər ki, bu üsul havanı daha səmərəli şəkildə təzələyir və soyutma sisteminə düşən yükü azaldır.

Avstriyalı fizik Verner Qruber izah edib ki, ventilyator otaqdakı havanın temperaturunu aşağı salmır.

Onun sözlərinə görə, cihaz yalnız mövcud havanı hərəkət etdirir, mühərriki isə işləyərkən hətta az miqdarda istilik də yaradır.

Bununla belə, insan özünü daha sərin hiss edir, çünki hava axını dəridəki tərin buxarlanmasını sürətləndirir. Bu proses zamanı orqanizm istilik itirir və bədən səthinin temperaturu aşağı düşür.

Məhz buna görə ventilyator yalnız hava axını birbaşa insana yönəldildikdə effektiv olur. Otaqdakı havanın temperaturunu isə demək olar ki, dəyişmir.

Samir