Soyuducunun alt hissəsində, xüsusilə tərəvəz qutularının altında su yığılması kifayət qədər yayılmış problemdir. Əksər hallarda bunun səbəbi sadə olur və problemi ev şəraitində aradan qaldırmaq mümkündür.

HİT.az xəbər verir ki, "Electrolux" mütəxəssislərinin məlumatına görə, belə vəziyyətdə ilk növbədə soyuducunun arxa divarında yerləşən drenaj dəliyi yoxlanılmalıdır.

Soyuducunun normal işləməsi zamanı içəridə nəm yaranır. Qapının açılıb-bağlanması və məhsullardan buxarlanan su nəticəsində əmələ gələn kondensat xüsusi drenaj dəliyindən axaraq kompressorun yaxınlığındakı qaba düşür və orada buxarlanır.

Lakin drenaj dəliyi qida qalıqları, çöküntülər və digər çirklərlə tutulduqda su axa bilmir. Bəzən drenaj kanalının daxilində buz da əmələ gələ bilər. Nəticədə su soyuducunun dibində toplanır.

Problemi aradan qaldırmaq üçün drenaj dəliyi ilıq su ilə ehtiyatla təmizlənə bilər. Lakin iti əşyalardan istifadə etmək məsləhət görülmür. Bu, soyuducunun daxili komponentlərinə zərər verə bilər. Təmizləmə üsulu konkret modeldən asılı olduğundan cihazın təlimatına baxmaq da vacibdir.

Qapının rezinini də yoxlamaq lazımdır

Su yığılmasının digər səbəbi soyuducunun qapısından isti və nəm havanın içəri daxil olması ola bilər. Qapı tez-tez açılırsa və ya rezin kipləşdirici öz funksiyasını düzgün yerinə yetirmirsə, kameraya daha çox rütubət daxil olur.

Nəticədə soyuq səthlərdə kondensat yaranır və suyun miqdarı artır. Cırılmış, deformasiyaya uğramış və ya çirklənmiş rezin kipləşdirici qapının tam bağlanmasına da mane ola bilər.

İsti yeməyi soyuducuya qoymayın

Soyuducuda həddindən artıq su yaranmasına isti yeməklər də səbəb ola bilər. İsti qida cihazın daxilində temperaturu və rütubəti artırır. Əmələ gələn buxar sonradan kondensata çevrilə bilər.

Buna görə bişmiş yeməkləri təhlükəsiz şəkildə soyutduqdan sonra soyuducuya yerləşdirmək, həmçinin açıq qabları mümkün qədər bağlı saxlamaq tövsiyə olunur.

Problem davam edirsə

Drenaj dəliyi təmizləndikdən və qapının kipləşdiricisi yoxlanıldıqdan sonra su yenə də yığılırsa, problem daha ciddi nasazlıqla bağlı ola bilər.

Soyuducuda həddindən artıq buz yaranırsa, su mütəmadi olaraq çölə axırsa və ya cihaz lazımi temperaturu saxlaya bilmirsə, defrost sistemi, drenaj və digər komponentlərdə nasazlıq ehtimalı var.

Belə hallarda soyuducunun daha ciddi zədələnməsinin qarşısını almaq üçün texniki mütəxəssisə müraciət etmək məsləhətdir.

Samir