Bu gün Ermənistan silahlı qüvvələrinin işğalından azad edilmiş Madagiz (Suqovuşan) kəndi Azərbaycan Respublikası Tərtər rayonunun kəndlərindən biridir.
Madagiz əvvəllər Ağdərə rayonu inzibati ərazisinə aid olub. Madagiz ilk dəfə 1991-1992-ci illərdə Azərbaycan Ordusu tərəfindən işğaldan azad edilib. Lakin 1994-cü ilin aprelində Ermənistan tərəfindən işğal edilib.
Kənd ərazisində Madagiz su anbarı və Madagiz-1 su elektrik stansiyası yerləşir.
Ermənilər Madagizi işğal etdikdən sonra burada hərbi hissələr yaradıb. 49971 saylı hərbi hissə Ermənistan ordusunun Qarabağdakı ən yaxşı hərbi hissələrindən biri hesab olunurdu. Bundan başqa erməni ordusunun "6-cı müdafiə rayonu" kimi qeyd etdiyi 33651 nömrəli hərbi hissə də Madagizdə yerləşirdi.
Madagiz 3 oktyabr 2020-ci il, Azərbaycan Silahlı Qüvvələri tərəfindən işğaldan azad olunub.
Bu şad xəbəri əhaliyə Azərbaycan Prezienti, Ali Baş Komandan İlham Əliyev elan edib. Daha sonra Ali Baş Komandan 1-ci Ordu Korpusunun komandiri Hikmət Həsənovu Madagizin işğaldan azad olunması münasibətilə təbrik edib.
Bundan əlavə Prezident İlham Əliyev Madagizin tarixi adını bərpa edərək, onun "Suqovuşan" adlandırılması barədə tapşırıq verib.
