Qaynarinfo-ya daxil olan məlumatda deyilir ki, Ayaz İmaməliyev ziyalı ailəsində doğulub. Atası Ağalar İmaməliyev kimya elmləri namizədidir. Uzun müddət Sumqayət şəhər 13 saylı orta məktəbdə müəllim işləyib. Hazırda Sumqayıt Dövlət Universitetində çalışır. 

 

Anası Elmira İmaməliyeva isə uzun müddət Sumqayıt şəhər 1 saylı poçt idarəsinin müdiri vəzifəsində çalışıb. Elmira İmaməliyeva ötən il dünyasını dəyişib.

 

Ayaz İmaməliyevin böyük qardaşı Asif İmaməliyev Milli Məclisin ikinci çağırış deputatı olub. Hazırda hakim Yeni Azərbaycan Partiyasının (YAP) İcra Katibliyinin sektor müdiri vəzifəsində işləyir. 

 

 

Digər qardaşı Əşrəf İmaməliyev Qarabağ müharibəsi veteranıdır. 44 günlük müharibədən sonra "Böyük Zəfər” medalı ilə təltif edilib. 

 

Ayaz İmaməliyev Azərbaycan Respublikası Prezidenti yanında Dövlət İdarəçilik Akademiyasının məzunudur. Əvvəllər Sumqayıt Şəhər İcra Hakimiyyətinin informasiya təminatı və təhlili sektorunun müdiri, Səbail Rayon İcra Hakimiyyətində Sənədlərlə və vətəndaşların müraciətləri ilə iş şöbəsinin müdiri olub. 2018-ci ilin sentyabrında BŞİH-in Sənədlərlə və vətəndaşların müraciətləri ilə iş şöbəsinin müdiri vəzifəsinə təyin edilib. 2019-cu ildə isə bu vəzifədən azad edilərək BŞİH-in tabeliyindəki Mənzil-Kooperativ Təsərrüfatı İdarəsinin rəisi postuna təyinat almışdı. 

 

Xatırladaq ki, BŞİH-in Aparat rəhbəri Elgin Həbibullayev Nərimanov rayon İcra Hakimiyyətinin başçısı vəzifəsinə təyinat alıb. BŞİH-in başçısı Eldar Əzizov Aparat rəhbəri vəzifəsini Ayaz İmaməliyevə həvalə edib. Bu barədə ilk xəbəri Qaynarinfo yayıb. Qurumun mətbuat xidməti xəbəri təsdiqləyib.