24 iyul tarixində Dövlət Təhlükəsizliyi Xidmətinin "Bilgəh” İstirahət mərkəzində 12-16 yaş arası məktəbli və yeniyetmələr üçün təşkil ediləcək "Cyber Summer School - 2023” beynəlxalq yay məktəbinin açılış tədbiri baş tutub.
Azərbaycan Kibertəhlükəsizlik Təşkilatları Assosiasiyasının təşkilatçılığı, "Azerconnect MMC”, "Caspel”, "Cyberpoint”, "Techpro DC” və "Huawei Technologies” şirkətlərinin sponsorluğu, "Gesco”, "A2Z Technologies”, "CISCO” və "Azerobot” şirkətlərinin tərəfdaşlığı ilə 30 iyul tarixinədək Bakı Ali Neft Məktəbində baş tutacaq yay məktəbinə cəlb edilmiş yeniyetmələrin və onların valideynlərinin iştirak etdiyi açılış tədbirində aidiyyəti dövlət qurumlarının, xarici ölkələrin ölkəmizdə fəaliyyət göstərən səfirliklərinin, eləcə də ali təhsil müəssisələrinin rəhbər vəzifəli şəxslərinin çıxışları dinlənilib. Bununla yanaşı, açılış tədbirinin iştirakçıları təşkil olunmuş texnoloji sərgidə "Caspel”, "Cyberpoint” "Techpro DC”, "Huawei”, "A2Z Technologies”, "Cisco” və "Azerobot” şirkətlərinin texnoloji həlləri və xidmətləri ilə tanış olub.
Ənənəvi olaraq hər il baş tutan yay məktəbi ərzində yerli və xarici mütəxəssislər tərəfindən iştirakçılar üçün kibertəhlükəsizlik sahəsində təlimlər, texnoloji turlar, habelə iştirakçılar arasında kibertəhlükəsizlik sahəsində bilik yarışının ("CTF”) həyata keçirilməsi planlaşdırılıb. Qeyd etmək lazımdır ki, "Cyber Summer School - 2023” yay məktəbinin əhatə dairəsi və beynəlxalq əhəmiyyəti bu il daha da genişləndirilmişdir. Belə ki, 30 iyul tarixinədək davam edəcək yay məktəbinə Azərbaycan, İsrail və Türkiyə ilə yanaşı Türk Dövlətləri Təşkilatına üzv olan Qazaxıstan, Özbəkistan, Qırğızıstandan olan yeniyetmələr, ümumilikdə 125 iştirakçı cəlb edilib.
Ödənişsiz əsaslarla ingilis dilində təşkil ediləcək beynəlxalq yay məktəbinə 12-16 yaş aralığında olan, zəruri ingilis dili, habelə informasiya texnologiyaları üzrə biliklərə malik və müsabiqədən keçmiş şəxslər cəlb edilib. Bakı Ali Neft Məktəbində təşkil ediləcək təlim və praktiki seminarlar isə Azərbaycan, İsrail və Türkiyənin sahə üzrə ekspertləri tərəfindən həyata keçiriləcəkdir. Ümumilikdə, yay məktəbinin davam edəcəyi müddət ərzində 20 təlimçi tərəfindən kibertəhlükəsizliyin müxtəlif aspektləri üzrə 20-dən çox təlim və praktiki seminarların, sonda isə yay məktəbi iştirakçıları arasında bilik ("CTF”) yarışının həyata keçirilməsi nəzərdə tutulub.
2021-ci ildən etibarən ənənəvi olaraq hər il həyata keçirilən layihənin əsas məqsədi tərəfdaş ölkələrdən olan yay məktəbi iştirakçıları arasında dostluq münasibətlərinin inkişaf etdirilməsinə, kibertəhlükəsizlik üzrə bilik, bacarıq və xüsusi həvəsə malik yeniyetmələrin müəyyənləşdirilərək ölkə daxilində və xaricində bir araya gətirilməsinə, habelə kibertəhlükəsizlik sahəsində ixtisaslaşmış mütəxəssis kimi yetişdirilməsinə dəstək verməkdir.
