1994-cü ildə Gürcüstanda anadan olan Anar Qurbanov bu gün Azərbaycanda velosiped sahəsində tanınan simalardan biridir. Keçmiş peşəkar velosiped sürücüsü olan Anar Qurbanov hazırda Xırdalanda velosiped təmiri, velosiped və aksesuar satışı ilə məşğuldur. Sosial mediada milyonlarla baxış toplayan videoları ilə o, həm biznesini inkişaf etdirir, həm də velosiped mədəniyyətinin təbliğinə töhfə verir.
Onunla velosipedə olan sevgisi, peşəkar idman yolu və gələcək planları haqqında ətraflı söhbətləşdik.
– Anar bəy, əvvəlcə uşaqlıq və velosipedlə ilk tanışlığınız haqqında danışardınız.
– Mən 1994-cü ildə Gürcüstanda anadan olmuşam. Uşaqlıqdan aktiv uşaq idim, daim hərəkətdə olmağı sevirdim. Velosipedlə ilk tanışlığım da məhz o illərə təsadüf edir. Əvvəlcə bu, sadəcə maraq idi. Amma zaman keçdikcə gördüm ki, bu maraq məndə ciddi həvəsə çevrilir. Hər gün saatlarla sürürdüm, özümü inkişaf etdirməyə çalışırdım.
– Peşəkar velosiped sürücüsü kimi fəaliyyətiniz necə başladı?
– İlk illər həvəskar şəkildə məşğul olurdum. Sonra artıq yarışlara qatılmağa başladım. Peşəkar səviyyədə sürüş həm fiziki, həm də psixoloji baxımdan böyük hazırlıq tələb edir. Bu illər mənə intizam, səbir və məqsədyönlülük qazandırdı. Velosiped mənim üçün sadəcə nəqliyyat vasitəsi yox, həyat tərzinə çevrildi.
– Peşəkar idmandan sahibkarlığa keçid necə baş verdi?
– Peşəkar sürücülük dövründə velosipedlərin texniki tərəflərinə çox maraq göstərirdim. Hansı detal necə işləyir, hansı hissə hansı funksiyanı yerinə yetirir – bunları dərindən öyrənməyə başladım. Yarışlara hazırlaşarkən öz velosipedimi tez-tez özüm təmir edirdim. Bu maraq zamanla peşəyə çevrildi.
Sonra qərara gəldim ki, topladığım təcrübəni biznesə çevirim. Azərbaycanda, xüsusilə Xırdalanda bu sahədə keyfiyyətli və peşəkar xidmətə ehtiyac olduğunu gördüm və fəaliyyətə başladım.
– Hazırda konkret olaraq hansı xidmətləri göstərirsiniz?
– Hazırda Xırdalanda velosiped təmiri, texniki baxış, ehtiyat hissələrinin dəyişdirilməsi, aksesuar satışı və yeni velosipedlərin satışı ilə məşğulam. Müştərilərim arasında həm gündəlik istifadəçilər, həm də peşəkar sürücülər var.
Hər bir velosipedə fərdi yanaşmağa çalışıram. Çünki hər sürücünün tələbi fərqlidir. Mənim üçün əsas məsələ keyfiyyət və etibardır.
– Sosial mediada böyük auditoriyaya sahib olmağınız biznesinizə necə təsir edir?
– Sosial media mənim fəaliyyətimdə çox önəmli rol oynayır. TikTok platformasında 1.3 milyon, Instagram səhifəmdə isə 300 min izləyicim var. Orada əsasən velosiped təmiri proseslərini, faydalı məsləhətləri, düzgün sürüş texnikasını və gündəlik iş həyatımı paylaşıram.
Bu, həm maarifləndirmə baxımından vacibdir, həm də insanlar ustaya etibar etmək üçün onun işini görmək istəyirlər. Sosial media vasitəsilə şəffaflıq yaranır və müştəri ilə daha yaxın ünsiyyət qurmaq mümkün olur.
– Azərbaycanda velosiped mədəniyyətini necə qiymətləndirirsiniz?
– Son illər maraq artıb. Xüsusilə gənclər arasında velosiped sürüşünə maraq çoxalıb. Amma düşünürəm ki, hələ görüləcək işlər çoxdur. Velosiped həm sağlamlıq, həm ekoloji baxımdan çox önəmlidir. Daha çox marşrutların yaradılması, yarışların təşkili və maarifləndirmə işləri bu sahəni daha da inkişaf etdirə bilər.
– Uğur qazanmaq istəyən gənclərə nə tövsiyə edərdiniz?
– Əgər bir sahəyə həqiqətən marağınız varsa, onu yarımçıq qoymayın. Mən velosipedi sevdiyim üçün bu nöqtəyə gəlib çıxmışam. Hər işin çətin tərəfi var, amma səbir və davamlılıq uğurun açarıdır. Ən önəmlisi isə işinizi sevərək görməkdir.
– Gələcək planlarınız nələrdir?
– Fəaliyyətimi daha da genişləndirmək istəyirəm. Daha böyük servis mərkəzi açmaq, daha çox çeşiddə velosiped və aksesuar təqdim etmək planlarım var. Həmçinin gənclər üçün təlimlər və ustad dərsləri təşkil etmək istəyirəm ki, velosiped mədəniyyəti daha da inkişaf etsin.
İdmandan ustalığa uzanan yol
Anar Qurbanovun hekayəsi göstərir ki, həvəs və zəhmət birləşəndə uğur qaçılmaz olur. Peşəkar idmandan qazandığı təcrübəni sahibkarlıqla birləşdirən Anar Qurbanov bu gün həm ustalığı, həm də sosial mediada milyonlarla insana çatan paylaşımları ilə velosiped sahəsində özünəməxsus mövqe qazanıb.
Onun fəaliyyəti bir daha sübut edir ki, düzgün istiqamətləndirilmiş hobbi gəlirli və uğurlu biznesə çevrilə bilər.
