İrəvan xanlığının varisi Əmir Əli Sərdar İrəvani İrəvan xanı Hüseynqulu xanın atasının kimliyi barədə maraqlı faktlar açıqlayıb.

Teleqraf.com-un məlumatına görə, o, Hüseynqulu xanın atasının adının bir sıra mənbələrdə göstərildiyi kimi Məhəmməd xan olmadığını bildirib.

Əmir Əli Sərdar qeyd edib ki, bəzi kitablarda Hüseynqulu xanın atası Məhəmməd xan kimi təqdim olunur, amma yanlışdır: "İrəvan xanı Hüseynqulu xanın Məhəmməd xan İrəvani ilə heç bir əlaqəsi yoxdur. 1818-ci ildəki vəqfnamə sənədində Hüseynqulu xanın atasının adı Qəzvinli Bəhramqulu bəy Qacar kimi göstərilir".

Əmir Əli Sərdar İrəvani həmçinin unikal fotoşəkil da paylaşıb. Foto barədə məlumat verən Sərdar İrəvani qeyd edib: "Solda İrəvanın Hüseynəli xanın oğlu 1785-ci il təvəllüdlü Məhəmməd xan Sərdar İrəvani, sağda İrəvanın son xanı, 1807-1827-ci illərdə yaşamış Sərdar İrəvani kimi tanınan Bəhramqulu Qəzvinli oğlu Hüseynqulu xan Qəzvinli dayanıb. Soldakı Məhəmməd xan Tehranda mühacirətdə olub, Hüseynqulu xan isə İrəvanın rəsmi xanıdır. Ancaq gördüyü kimi, Məhəmməd xan hələ də elita arasında dayanırdı.

Bu iki xan birbaşa əlaqəli deyildilər, lakin yeznə idilər. Hər ikisi Fətəli şahın qızlarına evlənib. Əvvəlcə rəqib olsalar da, hər ikisi sonradan ruslara qarşı vuruşublar.

Hüseynqulu xan Məhəmməd xandan böyük idi və 1827-ci ildə məğlubiyyətdən bir neçə il sonra ölüb. Məhəmməd xan isə Fəthəli şahın ölümündən sonra böyük uğur qazanıb. Məhəmməd şah Qacarlar dövründə Harat uğrunda müharibədə həyatını itirib".