“Azərbaycan Respublikasının Prezidenti yanında su təsərrüfatının vəziyyətinə həsr olunmuş videoformatda keçirilmiş müşavirədə, Neftçala rayonunda əhalinin içməli su ilə təminatı və əkin sahələrinin suvarılması sahəsində mövcud problemlərin aradan qaldırılması ilə bağlı ölkə rəhbərinin verdiyi tapşırıqlar Neftçala ictimaiyyəti tərəfindən böyük rəğbət hissi ilə qarşılanıb.”

HİT.Az-ın məlumatına görə, bunu jurnalistlərə açıqlamasında Neftçala rayon İcra Hakimiyyətinin başçısı Mirhəsən Seyidov deyib.

İcra başçısı qeyd edib ki, son aylarda Kür çayında suyun səviyyəsinin aşağı düşməsi, Xəzər dənizinin suyunun çay boyunca əks istiqamətdə axaraq suyu şorlaşdırması nəticəsində Neftçala rayonunda əhalinin içməli su ilə təminatında və əkin sahələrinin suvarılmasında ciddi problemlər yaranmışdı:

“Vəziyyətlə bağlı Prezident İlham Əliyevin tapşırığına əsasən indiyədək içməli su probleminin qismən həlli üçün Fövqəladə Hallar Nazirliyi, “Azərsu” ASC, Azərbaycan Avtomobil Yolları Dövlət Agentliyin rayon İcra Hakimiyyəti və sahibkarlar tərəfindən cəlb olunmuş ümumilikdə 35 ədəd su maşını vasitəsilə gündəlik 600 ton içməli suyun Salyan rayonundan daşınmasına, şəhər və qəsəbələrdə  quraşdırılmış ümumilikdə 65 ədəd su çəninin  və kəndlər üzrə yaşayış məntəqələrini əhatə edən 36 ədəd modul tipli sutəmizləyici qurğunun içməli su ilə təmin edilməsinə nail olunub. Görülən tədbirlər nəticəsində içməli suya olan gündəlik tələbatın cəmi 30%-nin ödənilməsi mümkün idi.”

M.Seyidov deyib ki, 23 iyulda keçirilən müşavirədə ölkə başçısının verdiyi tapşırığa əsasən Neftçalaya yaxın rayonlardan və Mərkəzi İcra Hakimiyyəti orqanları tərəfindən rayona əlavə olaraq 22 su maşını və 18 çən ilkin məhələdə ayrılıb. “50 su çəninin və digər zəruri texniki vasitələrin ayrılması nəzərdə tutulub. Artıq gecə saatlarında etibarən su probleminin həlli istiqamıtində bütün tədbirlər intensiv şəkildə davam etdirilir.”

İcra başçısı onu da əlavə edib ki, cənab Prezidentin ölkə ərazisində əhalinin sosial rifah halının yaxşılaşdırılması, aztəminatlı ailələrə qayğı ilə yanaşılması, vətəndaşlar tərəfindən ünvanlanan şikayət və ərizələrə xüsusi diqqət yetirilməsi istiqamətində verdiyi göstərişlər rayon ictimaiyyəti tərəfindən böyük rəğbət və qürur hissi ilə  qarşılanır. “Neftçala rayon ictimaiyyəti Prezident İlham Əliyevin   rayon ərazisində içməli su ilə təminatında və əkin sahələrinin suvarılmasında yaranmış çətinliklərin aradan qaldırılması ilə bağlı göstəridiyi diqqət və qayğını yüksək səviyyədə dəyərləndirir və minnətdarlıqlarını bildirirlər".