"Bu, yalnız BNA-nın səlahiyyətinə aid olan məsələ deyil”.

Qaynarinfo xəbər verir ki, bu barədə "Multimedia" İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz vahid tarif çərçivəsində taksi xidmətlərinin həyata keçirilməsi ilə bağlı məsələyə aydınlıq gətirərkən deyib. O bildirib ki, taksi fəaliyyətinin tənzimlənməsi və nəzarət mexanizmlərinin yaradılması məqsədilə BNA konsepsiya hazırlayıb:

"Konsepsiyada bütün taksi şirkətlərinin bir əldə cəmləşməsi, vahid dispetçer mərkəzinin yaradılması, vahid tarif sisteminin və kvotanın tətbiqi nəzərdə tutulub.

Düşünürəm ki, bununla da taksi bazarında istehlakçıların qanuni mənafelərinin və hüquqlarının pozulmasına gətirib çıxaran və rəqabərsiz mühitin formalaşmasına səbəb olan hərəkətə yol verilir. Bu isə antiinhisar qanunvericiliklə müəyyən olunan məsələdir. Əgər BNA təşəbbüsündə antiinhisar qanunvericiliyin tələbləri pozulursa, müvafiq sahədə dövlət nəzarətini həyata keçirən qurum - Antiinhisar Dövlət Xidməti buna reaksiya verməlidir. Taksi bazarındakı mövcud bazar bu qurum tərəfindən analiz olunmalı və hər hansı separat sövdələşmənin və inhisarçılığın mövcudluğu araşdırılmalıdır. Beləliklə, bu, yalnız BNA səlahiyyətinə aid olan məsələ deyil”.

Osman Gündüz deyib ki, Antiinhisar Dövlət Xidmətinin razılığı, müsbət rəyi olmadan taksi bazarında BNA Konsepsiyasında nəzərdə tutulan süni münasibətlər formalaşdırıla bilməz:

"Fikrimcə, BNA bu bazarda yaranmış münasibətləri normal tənzimləmək, xidmət səviyyəsini yüksəltmək istəyirsə, daha ağlabatan, daha təkmil və rəqəmsal həllər təklif etməlidir”.