Müğənni Azad Şabanov da vətəndaşları “McDonalds”ı boykot etməyə səsləyib.

HİT.Az xəbər verir ki, bu barədə yazan sənətçi Azərbaycanın “McDonalds” şirkəti üçün gəlirli yer olduğunu bildirib:

“Mən franşizanın nə olduğunu bilirəm. Bizim etdiyimiz boykotun “McDonalds”ın  Azərbaycandakı sahibinə, yəni azərbaycanlı iş adamına təsir edəcəyini də bilirəm. “McDonalds”da işləyən yüzlərlə azərbaycanlının iş yerlərini itirmək təhlükəsini də anlayıram. Məsələ bilirsiz nədir? “McDonalds” franşizasının qanunlarına görə hansısa filialı davamlı olaraq müəyyən gəlir limitini keçməyəndə o filial bağlanır. İllərdir ki, Azərbaycanda bu filialların açıq olmasının səbəbi bu gəlir limitinin daim keçilməsidir. Yəni Azərbaycan “McDonalds” üçün yetərincə gəlirli yerdir”.

A.Şabanov 3 ilə yaxındır şirkətin reklamlarının onun studiyası tərəfindən hazırlandığını da açıqlayıb:

“Biz “McDonalds” Azərbaycandan patriotik bir post istəməmişdik, etdilər, sağolsunlar. Bəs, bunu baş ofisin tələbi ilə siləndə düşünmürdümü ki, bu “McDonalds Azərbaycanın ərazi bütövlüyünü tanımır” mesajını verəcək? Mən hər şeyi gözə alıram, hətta 3 ilə yaxındır “McDonalds Azərbaycan”ın reklamlarının mənim və studiyamın tərəfindən işlənildiyini də nəzərinizə çatdırıram. Hazırda söhbət milli maraqlardan gedir. Dostum Orxan Mərdan demiş, “McDonald's Azerbaijan” şirkətinin rəhbərliyi, o postu qaytarın, adınızı “Həşhüş” qoyun sizi batmağa qoysaq namərdik. Amma baş ofisdən qorxmayın. Onlar bu ölkənin sərhədlərinə bələddirlərsə bunu qəbul etməlidirlər”. İndi isə boykot”.

Qeyd edək ki, bir müddət əvvəl “McDonald's”ın Azərbaycandakı rəsmi səhifəsi “Qarabağ Azərbaycandır” – deyə paylaşım etsə də ermənilərin boykotundan sonra postu silib. Paylaşımı sildikdən sonra açıqlama verən şirkət siyasətə qarışmadığını, əsas amallarının insanları qida ilə təmin etmək olduğunu bildirib.