Prezident Rəcəb Tayyib Ərdoğan Türkiyə Böyük Millət Məclisinin Azərbaycana hərbi qüvvələr göndərilməsi ilə bağlı qəbul etdiyi qanunu imzalayıb. Qanuna əsasən, Türkiyə hərbçiləri 1 il müddətinə Azərbaycandakı Rusiya-Türkiyə birgə Monitorinq Mərkəzində fəaliyyət göstərəcəklər. Qarabağ sazişinin imzalanmasından sonra gündəmdə olan əsas tələb o idi ki, Rusiya Azərbaycan torpaqlarına nə qədər hərbi qüvvə gətirirsə, Türkiyə də eyni qüvvə ilə gəlsin. Həmçinin Rusiya sülhməramlıları nə vaxta qədər burada qalacaqsa, türk hərbçiləri də həmin müddət ərzində Azərbaycanda qalsın. Ərdoğanın imzaladığı qanun isə vəziyyətin bir qədər fərqli olduğunu göstərir.
Mövzu ilə bağlı Yenisabah.az-a açıqlama verən millət vəkili, politoloq Aydın Mirzəzadə bildirib ki, üçtərəfli bəyanatda Türkiyə Silahlı Qüvvələrinin hansı müddətdə Azərbaycanda yerləşəcəyi barədə müddəa yoxdur:
“Azərbaycan, Rusiya və Ermənistan rəhbərləri tərəfindən imzalanan sazişdə Türkiyənin adı yer almır. Nəzərə almalıyıq ki, bu sənəd Azərbaycan və Ermənistan rəhbərlərinin ümumi razılığı ilə hər bir kəlmə ətrafında müzakirə getdikdən sonra konsensus şəklində qəbul edilib. Türkiyə hərbçilərinin Dağlıq Qarabağda sülhməramlı əməliyyatda iştirakını üçtərəfli saziş imzalandıqdan sonra Azərbaycan təkid etdi. Məhz Azərbaycanın təkidi sülhməramlı qüvvələrin monitorinq mərkəzində Türkiyə nümayəndələrinin də təmsilçiliyinə imkan verdi. Dünən Rusiya prezidenti Vladimir Putin müsahibəsində bildirdi ki, Ermənistanda hələ Türkiyəyə qarşı müəyyən neqativ münasibət var, erməni əhalisi ilə Türkiyə hərbçilərinin birbaşa üzdə olması müəyyən problemlər yarada bilər. Bu baxımdan danışıqlar apardığı tərəflərə Türkiyənin monitorinq mərkəzində iştirakı məsələsini təklif edib və Azərbaycan da bu təklifi qəbul edib”.
Millət vəkili qeyd edib ki, qanuna əsasən, Türkiyənin bir il müddətinə monitorinq mərkəzində olması o demək deyil ki, bir ildən sonra onun iştirakı dayandırılacaq:
“Türkiyə Silahlı Qüvvələrinin nümayəndələrinin bir il müddətinə göndərilməsi nəzərdə tutulur. Bir il bitdikdən sonra bu məsələ yenidən gündəmə gələcək və həmin o mandatın, iştirak müddəti artırılacaq. Yəni bu, nəzərdə tutulur. Əgər sülhməramlılar Laçın dəhlizində və Azərbaycan-Ermənistan silahlı qüvvələrinin arasında yerləşirsə, monitorinq mərkəzi həmin sülhməramlı əməliyyatın yerinə yetirilməsinə nəzarət edir. Burada Rusiya və Türkiyə hərbçiləri bərabər hüquqa malikdirlər. Yəni Türkiyə hərbçiləri həmin postlarda olacaq, fəaliyyətin həyata keçirilməsinə nəzarət edəcəklər. Hansısa qanun pozuntusu olarsa, bu məsələ barədə artıq Rusiya tərəfi ilə ümumi razılaşma əsasında birgə addımlar atacaqlar. Qardaş ölkənin Azərbaycanın işğal olunmuş ərazilərində sülhün bərqərar olması prosesində iştirakı vacibdir. Türkiyənin bundan sonra da Azərbaycanla bağlı məsələlərdə yaxın dostumuz kimi iştirak etməsi ölkəmiz tərəfindən qoyulan şərtlərdən biridir”.
