Rio Olimpiadasının qalibi, dünya və ikiqat Avropa çempionu olan taekvondoçu Radik İsayev Tokio Yay Olimpiadasında çıxış edə bilməyəcək.
Oxu.Az-ın xəbərinə görə, o, Bolqarıstanın paytaxtı Sofiyada keçirilən Avropa Olimpiya Təsnifat turnirinin +80 kq çəki dərəcəsinin yarımfinalında makedoniyalı Deyan Qeorqiyevskiyə 6:13 hesabı ilə uduzub.
Bununla da 31 yaşlı idmançı Olimpiadaya lisenziyanın bir addımlığında şansdan məhrum olub.
Qeyd edək ki, 2016-cı il Rio Olimpiadasından fərqli olaraq, Tokioda Azərbaycan taekvondoda iki idmançı ilə təmsil olunacaq. Bunlar Milad Beiqi və Fəridə Əzizovadır.
