"Əl Nəsr" klubu hücumçusu Kriştiano Ronaldonun "Əl Hilal"la oyundan sonra etdiyi qalmaqallı jestlə bağlı açıqlama yayıb.

Fanat.Az xəbər verir ki, "Squawka" klubun izahatını belə təqdim edib:

“Ronaldo zədəlidir. O, “Əl Hilal”ın futbolçusu Qustavo Kuellar ilə toqquşdu, zərbə çox həssas nahiyəyə dəydi. Bu, təsdiqlənmiş məlumatdır.

Azarkeşlərin izahatlarına gəlincə, onlar istədiklərini düşünməkdə azaddırlar”.

Qeyd edək ki, Ronaldo matçdan sonra paltardəyişmə otağına yollanarkən "Əl Hilal"ın tərəfdarları Lionel Messinin adını çəkərək onu qıcıqlandırıblar. O, azarkeşlərin davranışına qarşılıq olaraq əlini qasıq nahiyyəsinə atmaqla reaksiya verib. Bu isə narazılığa səbəb olub. Hətta Səudiyyə Ərəbistanının tanınmış vəkili Nuf bin Əhməd portuqaliyalıların davranışına görə deportasiya olunması iddiası ilə prokurorluğa müraciət ünvanlayıb.