Rusiya ən son “Sarmat” nüvə raketlərini “yaxın gələcəkdə” döyüş növbəsinə keçirəcək. 

HİT.az xəbər verir ki, bunu Rusiya prezidenti Vladimir Putin hərbi ali məktəblərin məzunları ilə görüşündə deyib.

Putin Ukraynadakı müharibə zamanı “yeni çağırışları” və “əvəzsiz təcrübəni” nəzərə alaraq ordunu təkmilləşdirməyə söz verib. Bu kontekstdə Putin nüvə triadasının inkişafını ən mühüm vəzifə adlandırıb, onun sözlərinə görə, bu, təkcə Rusiyanın özünün hərbi təhlükəsizliyinə deyil, həm də “qlobal sabitliyə” təminat verir.

"Artıq strateji raket qoşunlarının bölmə və birləşmələrinin təxminən yarısı ən son "Yars" kompleksləri ilə təchiz olunub, qoşunlar "Avanqard" hipersəs başlıqlı müasir raket sistemləri ilə yenidən silahlanır. Yaxın vaxtlarda "Sarmat"ın ilk buraxılış qurğuları işə salınacaq", deyə Putin bildirib.

Putin həmçinin qeyd edib ki, “planlara uyğun olaraq” strateji aviasiya və donanmanın nüvə arsenalları doldurulur. Xüsusilə, hipersonik "Zirkon" raketləri ilə silahlanmış "Sovet İttifaqı Donanmasının Admiralı Qorşkov" freqatı döyüş xidmətinə keçib.

RS-28 "Sarmat" beşinci nəsil strateji mina əsaslı raket kompleksidir. Ağır çoxpilləli qitələrarası ballistik raketlə təchiz edilib. "Sarmat" köhnəlmiş sovet R-36M2 "Voyevoda" raketlərini əvəz etmək üçün yaradılıb.

İddia edilir ki, “Sarmat” raket əleyhinə müdafiədən daha uğurla yan keçmək üçün sələflərindən daha mürəkkəb uçuş yolu ilə fərqlənir. Xüsusilə bildirilir ki, “Sarmat” yerləşdirilmiş raket əleyhinə batareyalardan yan keçərək, Yerin Cənub qütbündən düşmən ərazisini vurmağa imkan verən “orbital bombardman” etməyə qadirdir.

Samir