Çin Kommunist Partiyasının Mərkəzi Komitəsi və Çin Xalq Respublikasının Dövlət Şurası Tayvan ilə Çinin ən yaxın əyaləti olan Futjian arasında inteqrasiyanın dərinləşdirilməsi haqqında direktiv imzalayıb. 

HİT.az-ın məlumatına görə, sənəddə qeyd edilir ki, Fujian əyaləti Tayvanla inteqrasiya üçün “nümayiş zonası” və materik Çinə köçmək qərarına gələn ada sakinləri və şirkətlər üçün “ilk ev” olacaq.

Çin səlahiyyətliləri “Tayvan boğazının hər iki tərəfinin bir ailə olduğunu” xatırladır və sənaye və maliyyə sahələrində əməkdaşlığı dərinləşdirməyə, materik Çində Tayvan şirkətləri üçün iş şəraitini yaxşılaşdırmağa və onların Çin birjalarına girişini asanlaşdırmağa söz verir. Plan Tayvan müəssisələrinin Fujianda ilk dəfə sərmayə qoymasına və yayım şirkətləri qurmasına icazə verilməsini tələb edir. Fujiana köçməyə qərar verən tayvanlı işçilər və onların ailələri üçün Çin hakimiyyəti sosial dəstək proqramları və iş yerləri, daşınmaz əmlak almaq və uşaqları dövlət məktəblərinə yazdırmaq imkanı vəd edir.

Plan Pekin və Taypey arasında gərginliyin artması fonunda hazırlanıb. Tayvan səlahiyyətlilərinə görə, Çin adaya hərbi təzyiqi artırmağa davam edir. Xüsusilə, direktivin dərcindən bir gün əvvəl dünya mediası “Şandunq” aviadaşıyıcısının iştirakı ilə Çinin son vaxtlar ən böyük hərbi dəniz təlimlərinin başlaması barədə məlumat yayıb. “The Wall Street Journal”ın məlumatına görə, manevrlərdə iştirak edən gəmilər Tayvan boğazından keçib.

Tayvan təklif olunan inteqrasiya planına artıq cavab verib. Demokratik Tərəqqi Partiyasının deputatı Vanq Tinqyu CNN-ə deyib ki, inteqrasiya planı sadəcə olaraq “gülünc”dür: "Çin Tayvana qarşı vahid cəbhə kimi necə işləyəcəyindən çox, ümidsiz borclarla necə mübarizə aparacağını düşünməlidir".

Samir