Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev Bakıda günahsız dinc əhalinin qətliamına göstəriş verən keçmiş SSRİ lideri Mixail Qorbaçovun bir neçə ay sonra 1990-cı ildə Nobel Sülh Mükafatına layiq görülməsinə diqqət çəkib.
HİT.az xəbər verir ki, o, bu barədə “X” hesabında paylaşım edib.
“Qırmızı qərənfillər Qara 20 Yanvarın, Azərbaycan xalqının müqavimətinin və müstəqillik arzusunun simvolu oldu. Qəribədir ki, Bakıda günahsız dinc əhalinin qətliamına göstəriş verən keçmiş SSRİ lideri Mixail Qorbaçov bir neçə ay sonra 1990-cı ildə Nobel Sülh Mükafatına layiq görülüb”,- H.Hacıyev qeyd edib.
Xatırladaq ki, bu gün Azərbaycan tarixinə Qanlı Yanvar faciəsi kimi daxil olmuş 1990-cı il 20 Yanvar hadisələrinin növbəti ildönümüdür. 1990-cı il yanvarın 19-dan 20-nə keçən gecə birbaşa Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə SSRİ Müdafiə Nazirliyi, Dövlət Təhlükəsizlik Komitəsi və Daxili İşlər Nazirliyinin qoşun hissələri Bakıya və Azərbaycanın bir neçə rayonuna yeridilib, dinc əhali ağır texnikadan və müxtəlif tipli silahlardan atəşə tutularaq kütləvi qətlə yetirilib.
Fövqəladə vəziyyətin tətbiqi əhaliyə elan olunanadək hərbi qulluqçular 82 nəfəri amansızcasına qətlə yetirib, 20 nəfəri ölümcül yaralayıb. Fövqəladə vəziyyət elan edildikdən sonra isə bir neçə gün ərzində Bakı şəhərində 21 nəfər öldürülüb. Fövqəladə vəziyyətin elan olunmadığı rayon və şəhərlərdə - yanvarın 25-də Neftçalada və yanvarın 26-da Lənkəranda daha 8 nəfər qətlə yetirilib. Beləliklə, qoşunların qanunsuz yeridilməsi nəticəsində Bakıda və ətraf rayonlarında 147 nəfər öldürülüb, 744 nəfər yaralanıb.
Red Carnations became the symbol of Black January 20th, resistance and aspiration for independence of Azerbaijani people.
— Hikmet Hajiyev (@HikmetHajiyev) January 20, 2024
Ironically, former USSR leader Mikail Gorbachov, who ordered a massacre of innocent civilians in Baku, was awarded with the Nobel Peace Prize a couple of… pic.twitter.com/kwoBvwVShW
