Avropa İttifaqı (Aİ) bloklanmış Rusiya aktivlərindən Ukraynaya hərbi yardım göstərmək üçün istifadə imkanlarını araşdırır. 

HİT.az xəbər verir ki, bu barədə regional birliyin xarici işlər və təhlükəsizlik siyasəti üzrə ali nümayəndəsi Cozep Borrel bildirib.

"Əgər biz razılaşsaq ki, bu aktivlər Ukraynanın yenidən qurulmasını dəstəkləmək üçün istifadə oluna bilər, o zaman onlardan Ukraynanın dağıdılmasının qarşısını almaq üçün də istifadə edilə bilər. Bu isə Ukraynanın hərbi potensialının və ya müdafiə-texnoloji bazasının artırılması deməkdir", deyə diplomat Brüsseldəki mətbuat konfransında qeyd edib.

O əlavə edib ki, assosiasiya Rusiyanın aktivlərindən əldə etdiyi gəliri Avropa Sülh Fondu vasitəsilə Ukrayna üçün hərbi texnika almaq üçün istifadə edə bilər. Borrelin fikrincə, bu, Aİ üçün irəli addım olacaq.

Martın 5-də RİA Novosti agentliyi yüksək rütbəli Avropa mənbəsinə istinadən xəbər verib ki, Aİ Şurası hələ də Rusiya Federasiyasının dondurulmuş aktivlərinin Ukraynaya dəstək məqsədilə istifadəsi ilə bağlı razılığa gələ bilməyib. Agentliyin məlumatına görə, hazırda assosiasiyaya üzv olan ölkələr müvafiq müzakirələri davam etdirirlər. Mənbə aydınlaşdırıb ki, müzakirə ictimai müstəvidə də aparılır.

Bundan əvvəl “Financial Times” qəzeti bloklanmış Rusiya aktivlərinin yenidən investisiyasından gələcək mənfəətin istifadəsi ilə bağlı Avropa Komissiyasının (AK) sənədlərindən birinin məzmununu dərc etmişdi. Orada vurğulanır ki, Brüssel bu vəsaiti Ukrayna müdafiə sənayesinin inkişafına yönəltmək niyyətindədir. Komissiyanın tezliklə bu sənədi regional birliyə üzv dövlətlərin baxılması üçün təqdim edəcəyi gözlənilir.

Samir