Gürcüstanın baş naziri İrakli Kobaxidze "xarici agentlər haqqında" qanuna qarşı davam edən etirazlar fonunda ölkədə "Maydan"ın olmayacağını bildirib.
HİT.az xəbər verir ki, baş nazir bu barədə jurnalistlərə danışıb.
"Maydan"la Gürcüstanda gedən proseslər arasındakı paralelə gəlincə, mən hamıya bildirmək istəyirəm ki, Gürcüstanda "Maydan"a heç kim nail olmayacaq. Xatırladım ki, "Maydan"ın Ukrayna üçün hansı nəticələri oldu. Sonra Ukrayna rəhbərliyi kənardan təyin olundu, bir dəfə, sonra ikinci dəfə və sonda təyin edən hadisələrin inkişafı üçün məsuliyyət daşımadı", deyə baş nazir qeyd edib.
Onun sözlərinə görə, Gürcüstan hakimiyyəti üçün ən vacib məsələ müstəqillik qayğısıdır.
Mayın 14-də Gürcüstan parlamenti küçə etirazlarına baxmayaraq, “Xarici təsirin şəffaflığı haqqında” qanunu üçüncü və yekun oxunuşda qəbul edib. Mayın 18-də Gürcüstan prezidenti Salome Zurabişvili "xarici agentlər haqqında" qanuna veto qoyub və onu “rus” və “qeyri-konstitusiya” adlandırıb.
Mayın 28-də Gürcüstan parlamenti yeddi saatlıq müzakirədən sonra prezident Salome Zurabişvilinin "xarici agentlər haqqında" qanuna veto qoymasını aradan qaldıraraq onu orijinal variantında qəbul edib. 84 deputat lehinə, dördü əleyhinə səs verib. Artıq ay yarımdır ki, Tiflisdə və Gürcüstanın iri şəhərlərində davam edən küçə etirazlarına, ABŞ və Avropa İttifaqının sanksiya hədələrinə baxmayaraq, parlament bu qanunu qəbul edib. İndi sənəd imzalanmaq üçün prezident Zurabişviliyə göndərilib, imzalamaq üçün onun beş gün vaxtı var. O, imzalamasa, qanun parlamentin sədri tərəfindən imzalanacaq və dərc olunacaq.
Qanunun dərcindən sonra Gürcüstanın Ədliyyə Nazirliyi və milli dövlət reyestr agentliyi 60 gün ərzində “xarici dövlətin maraqlarını güdən təşkilatların” reyestrini yaratmalıdır. Reyestr işə salındıqdan sonra gəlirlərinin 20%-dən çoxunu xarici dövlətdən alan bütün qeyri-hökumət təşkilatları və KİV-lər üçün reyestrdə qeydiyyat məcburi olur.
Samir
