ABŞ Demokratlar Partiyasının rəsmiləri prezidentliyə namizəd Kamala Harrisin Donald Trampla qarşıdakı debatda çıxışı ilə bağlı artan narahatlıqları özəl olaraq etiraf edirlər ki, bu da yarışa həlledici təsir göstərə bilər. 

HİT.az bu barədə "The Hill"ə istinadən xəbər verir.

Demokratlar Partiyasından olan adını açıqlamayan senator deyib ki, debatdan əvvəl siyasi birlik daxilində böyük narahatlıq var.

"Əgər siz vicdanlı, məlumatlı demokratsınızsa, əsəbisiniz. Necə əsəbi olmaya bilərsən? Bütün yelləncək ştatlarında Trampa 48-49 faiz dəstək var, bu anlaşılmaz görünür, amma var”, deyə senator bildirib.

Eyni zamanda, qəzetin həmsöhbəti prezidentliyə namizədin mümkün qədər yaxşı hazırlaşacağına ümid etdiyini bildirib.

Öz növbəsində, Demokrat siyasi strateq Rey Zakkaro bildirib ki, siyasətçilər bu müzakirənin fəlakətli və ya monumental ola biləcəyini bilirlər. Debatda çıxış namizədlərin taleyini həll edə bilər.

Avqustun 11-də Tramp Harrislə üç raund televiziya debatını elan edib. Onun sözlərinə görə, onlardan birincisi sentyabrın 4-də Fox News kanalında, ikincisi sentyabrın 10-da ABC-də, üçüncüsü isə sentyabrın 25-də NBC telekanalında baş tutmalıdır. Lakin sonradan Harrisin bu cədvəllə razılaşmadığı məlum olub.

Samir