Bu mövsüm Azərbaycan Premyer Liqasında diqqətçəkən əsas komanda "Turan Tovuz"dur. 

Tovuz təmsilçisi meydana çıxdığı 11 matçda 24 xal toplayıb. Komanda hazırda liqanın 2-ci pilləsində qərarlaşıb. "Turan" "Qarabağ"dan sonra Premyer Liqada ən çox qalib gələn ikinci komanda ünvanına da sahibdir. 

Onların uğurlu çıxışı və oynadıqları futbol isə bir çox futbol azarkeşinin xoşuna gəlir. Üstəlik, bir region komandasının bunları bacarması təqdirəlayiqdir. 

Bəs "Turan Tovuz"un uğurunun sirri nədir? 

Mövzu ilə bağlı futbol eksperti Aslan Kərimov Hit.az-a açıqlama verib. O, "Turan Tovuz"un uğurunun əsas səbəblərindən danışıb:

"Hesab edirəm ki, kluba adlı-sanlı məşqçilərin gəlməsi, özlərinin bazasının olması və rəhbərliyin də baş məşqçiləri dəstəkləməsi əsas faktordur. Nəticədə, bütün bunlar "Turan Tovuz"un uğurlu olmasına gətirib çıxardı. 

Üstəlik, büdcələrinə uyğun yaxşı transferlər edirlər. Evdə keçirdikləri oyunda rəqib komandanı azarkeşlərinə görə psixoloji olaraq bir az da üstələyə bilirlər. Bu da onların yaxşı çıxışına dəstəkdir". 

Lakin mütəxəssisin sözlərinə görə, "Turan Tovuz"u qarşıda çətin oyunlar gözləyir:

"Ev oyunlarında yaxşı çıxış etsələr də, səfərlərdə bir qədər çətinlik çəkirlər. Həmçinin, "Turan"a Avropa Liqasında mübarizə aparmaq üçün lazım olan yeri tutmaq da çox çətin olacağını düşünürəm. Çünki digər komandalar da güclənirlər".

Pərviz