London Moda Həftəsi Britaniya Moda Şurasının davamlılıq təşəbbüsləri çərçivəsində mühüm addım olaraq, dizaynerlərə ekzotik heyvan dərisindən istifadə edən kolleksiyaları nümayiş etdirməyi qadağan edir.

AZƏRTAC xarici mediaya istinadla xəbər verir ki, artıq dizaynerlər London Moda Həftəsinin rəsmi təqviminə daxil olmaq üçün müraciət edərkən yeni siyasətlə razılaşmaq məcburiyyətində qalacaqlar.

Kopenhagen Moda Həftəsi bu ilin əvvəlində podiumda ekzotik dəriləri qadağan etdi, lakin Milan, Paris və Nyu-Yorkda keçirilən analoji tədbirlər hələ də buna əməl etməyib.

Dəri məhsulları ilə bağlı müzakirələr heyvanların rifahı və davamlılıq qruplarının təzyiqi fonunda sənayedə qızğın müzakirə olunur, lakin lüks dizaynerləri hələ də onlardan istifadə edirlər.

“Gucci”, “Bottega Veneta” və “Balenciaga” kimi brendlərin sahibi olan “Kering” şirkəti xəzi qadağan edir, lakin onun brendlərində hələ də ekzotik dərilərdən istifadə olunur. “Loewe”, “Givenchy” və “Celine” şirkətlərinin sahibi olan LVMH isə nə ekzotik dəriləri, nə də xəzləri qadağan etmir. Bu barədə “Vogue Business” xəbər verir.

Bununla belə, bir çox dizaynerlər artıq təbii xəzlərdən və ilanlar, timsahlar kimi heyvanların ekzotik dərisindən ekoloji cəhətdən daha təmiz olan metodların xeyrinə imtina ediblər.