Yaşından asılı olmayaraq hər bir insan ölümdən qorxur. Ancaq bəzi insanlar var ki, onlar digər insanların sağ qalması üçün özlərini fəda edir. Belə qəhrəman insanlar həmişə tarixdə olub və olacaq.

Bu gün ölkəni silkələyən təyyarə qəzası bir daha ölümə doğru getmək fikrini aktuallaşdırdı.

Bakı-Qroznı reysi üzrə uçan təyyarədə olan sərnişinlərin hər biri təyyarədə nəyinsə duz getmədiyini anlamışdılar və ölümə doğru getdiyini hiss ediblər. 

Biz bunu paylaşılan videolarda bir daha şahidi olduq. Təyyarədə olan sərnişinlər təhlükə ilə bağlı həyəcan keçirir, ölüm qorxusu , sağ qalmaq üçün mübarizə aparırlar.

Həmin təyyarənin peşakar pilotları və heyət  isə  sərnişinlərə səbrli olmağı, kəmərləri möhkəm bağlamağı tövsiyyə verirdilər. Bələdçinin səsi titrəyə-titrəyə "hər şey yaxşı olacaq" ifadəsini deyirdi. O, ölümə getdiyini bildiyi halda sərnişinlərin qayğısına qalır, onlara sakit qalmağı tövsiyyə edirdi.

Zərif bir xanımın titrək səsi sərnişinlər üçün ümid yeri oldu. O bilirdi ki, sağ qalmaq şansı azdır, lakin qorxuya təslim olmadı.

Təbiət varsa, yaşam varsa, mücadilə varsa, insan varsa faciə qaçılmazdır. Həyat nə qədər mürəkkəb olsa da, bu da keçəcək. Yenə gözəl günlər gələcək, yenə inamlı günlər gələcək. İnsan daim öz külündən yaranacaq. Yalnız və yalnız bir şey unudulmayacaq.

"Hər şey yaxşı olacaq!" Millətimizə, dövlətimizə çox-çox keçmiş olsun...

Sevinc