Pakistanda dağlıq Gilgit-Baltistan bölgəsindəki fermerlər eyniadlı Buddist tikililərə bənzədikləri üçün "stupa" adlanan buz qüllələri şəklində suvarma üçün rütubəti saxlayaraq, süni buzlaqlarla quraqlıqla mübarizə aparmağa başlayıblar. 

HİT.az xəbər verir ki, bu barədə Agence France-Presse (AFP) məlumat yayıb.

Qışda dağ çaylarından gələn su borular vasitəsilə yönəldilir və havaya səpilir. Sıfırdan aşağı temperaturda damcılar donaraq konus formalı buz blokları əmələ gətirir. Yazda onlar tədricən əriyir, buzlaqların təbii əriməsindən çox əvvəl sahələri su ilə təmin edirlər.

Pakistanda ilk buz stupaları yeddi il əvvəl ortaya çıxdı və bu gün onlardan 20-dən çox kənd istifadə edir. BMT-nin məlumatına görə, bu, 16 min insanı su ilə təmin edib. Fermerlər artıq ildə bir məhsul əvəzinə bir neçə məhsul yığa biləcəklərini deyirlər.

"Biz buzlaqların əriməsini iyun ayına qədər gözləyirdik. Artıq yazda su var", deyə fermerlər qeyd ediblər.

Pakistan iqlim dəyişikliyinə ən həssas olan ölkələrdən biridir. Burada temperatur orta dünya səviyyəsindən iki dəfə sürətlə yüksəlir və Qaraqoramdan başqa buzlaqlar sürətlə əriyir. Buz stupaları yerli icmaların yeni şəraitə necə uyğunlaşdığına bir nümunə olub.

Samir