Üç avropalı məmur "Reuters" agentliyinə bildirib ki, görüş rəsmi elan edilməmişdən əvvəl Birləşmiş Ştatlar Aİ3-ə (Böyük Britaniya, Almaniya və Fransa) Omanda İranla nüvə sazişi üzrə danışıqlar barədə məlumat verməyib. 

HİT.az xəbər verir ki, agentliyin mənbələrinin məlumatına görə, Avropa ölkələrinin nümayəndələri amerikalı həmkarları ilə bir neçə dəfə İranın nüvə proqramını müzakirə ediblər, lakin bu görüşlər kifayət etməyib.

"Reuters"in üç mənbəsi NATO xarici işlər nazirlərinin aprelin əvvəlində keçiriləcək iclası çərçivəsində ABŞ dövlət katibi Marko Rubio ilə İranla bağlı görüşü təşkil etməyin çətin olduğunu bildirib. "Avropa üçlüyü ABŞ-a etibar etmir, çünki onlar onlarla məsləhətləşmədən təşəbbüslər irəli sürürlər", deyə yüksək səviyyəli avropalı diplomat bildirib.

Ekspertlərin fikrincə, ABŞ-ın İrana maksimum təzyiq göstərmək üçün Avropa müttəfiqləri ilə koordinasiyalı diplomatik strategiyaya ehtiyacı var. Beləliklə, “Avropa üçlüyü” Tehranı ilin ortalarına qədər yeni nüvə sazişi imzalamağa çağırıb, əks halda Böyük Britaniya, Almaniya və Fransa snapback-i işə salacaqlar – bu mexanizm İranın nüvə inkişaflarına cavab olaraq BMT Təhlükəsizlik Şurasının İrana qarşı tətbiq etdiyi bütün sanksiyaların bərpasını nəzərdə tutur.

ABŞ 2018-ci ildə İranın nüvə sazişindən çıxdığı üçün bu mexanizmdən istifadə edə bilmir. Donald Tramp ikinci müddətə başlayandan bəri İrandan yeni nüvə sazişi üzrə danışıqlara başlamağı tələb edib. Tehran yalnız vasitəçiliklə danışıqlara razılıq verib. İki ölkənin nümayəndə heyətləri aprelin 12-də Omanda görüşəcək. Həmin gün ABŞ prezidentinin xüsusi nümayəndəsi Stiv Vitkoff İranın “yuxarı nümayəndəsi” ilə birbaşa danışıqları planlaşdırır.

Samir