Çinin Cənub-Şərqi Universitetinin alimləri sarımsağın qanda qlükoza və xolesterinin səviyyəsini effektiv şəkildə normallaşdırdığını müəyyən ediblər. 

Hit.az xəbər verir ki, araşdırmanın nəticələri "Nutrients" jurnalında dərc olunub.

Tədqiqatçılar bitki qidaları və ədviyyatların insanın kardiometabolik sağlamlığına təsiri (meta-analiz) haqqında əvvəllər dərc olunmuş 29 elmi məqalənin nəticələrini təhlil etdikdən sonra bu qənaətə gəliblər. Tədqiqatda müxtəlif ölkələrdən ümumilikdə 1567 nəfər iştirak edib.

Könüllülərin yaşı 18-80 arasında olub. Qeyd olunur ki, eksperimentlərdə həm sağlam insanlar, həm də 2-ci tip şəkərli diabet, ürək-damar xəstəliyi, alkoqolsuz qaraciyər piylənməsi, infarkt, piylənmə, hipertoniya və polikistik yumurtalıq sindromu olan subyektlər iştirak edib.

Tədqiqatlar zamanı sarımsaq xam və toz halında, həmçinin yaşlı ekstrakt və pəhriz əlavəsi formalarında istehlak edilib.

Bir meta-analiz göstərib ki, sarımsaq istehlakı hər cəhətdən müsbət təsir göstərib və qan şəkəri və xolesterinin səviyyəsini azaltmağa kömək edib. Alimlər sarımsağın faydalı xüsusiyyətlərinin orqanizmdə allisin adlı üzvi birləşmənin sintezini sürətləndirmək qabiliyyəti ilə bağlı olduğunu irəli sürüblər. Allisin qan dövranını normallaşdırır, antimikrob aktivliyə malikdir və qaraciyərdə trigliseridlərin (yağların) əmələ gəlməsini boğur.

Samir